موسوعة الادب العربي في خوزستان

TPL_KH_LANG_KH_MOBILE_DESKTOP TPL_KH_LANG_KH_MOBILE_REGISTER TPL_KH_LANG_KH_MOBILE_LOGIN

الشاعر حسن عاشور القنواتي

الشاعر حسن عاشور القنواتيالشاعر حسن عاشور القنواتي: شاعر من شعراء الشعر الشعبي في خوزستان ولد عام ۱۳۴۸ شمسي في شادکان (الفلاحية) و ترعرع بها في حضن والديه و اهله و اکتسب الدين و حب اهل البيت عليهم السلام و من جمال البيئة الخلابة و روح الشعر الحاکمة على المدينة ما يصقل موهبته الادبية و هاجر الى خرمشهر (المحمرة) و عاشر کوکبة لامعة من شعراء المدينة فاصبح شاعراً، کبيرا يجيد الشعر و يجول في جميع مجالاته و ينظم في اکثر اوزانه و الوانه  کالقصائد و الأبوذیه و ابوذیة و الهات و الميمر و غيرها من انماط الشعرالشعبي، امتاز شعر المترجم له باصالة المفردة وجودة الوزن و حلاوة النغمة و يزيده روعة، الاحساس المرهف و الکلمة المعبرة و الأداء الحزین، له دراسات حول الشعر الیاباني الذي یسمي بشعر ( الهایکو ) و قام بترجمت بعض من هذه الاشعار و ایضاً یحب الشعر الفارسي و شعراء الفارسیین کالشاعر احمد شاملو و حافظ و السعدي الشیرازي و غیرهم من شعراء الایرانیین. ابدع لون من الشعر المجنس يختم کل مصرع بالجناس اللفظي و المصرع الرابع بحرف الراء.

من شعره:

القصیدة

(الشارع البي گبة حسین)

بعض الشوارع ما ينامن للصبح

تعبه چثير ( الّي چبير و لايگ الکبر الجرح )

هنّه الشوارع ليلهن هم يشبه الليل البشر

هم ذکريات الهن و هم ببالهن توجد صور

ليله يسامرهن حچي

و ليله يسکّتهن لحن حچي المطر

ويريحهن طين و غنه المرازيب

و يفوّحن شذه و طيب

مرّه يمر بيهن حزن ، مرّه فرح

و مرّه يمر بيهن طفل راکب علي چتاف المرح

ليله يضوّيهن ضوه العراريس

و ليله تغطّيهن الظلمه و ينخن الفوانيس

مرّه يسلّيهن حچي المساجد

و مرّه يسمعن دگّة النواقيس

و مرّه يسمعن اسطوانة غنه الگبّنچي اليخاطب چان حادي العيس

*****

مو کل الدروب

مو کل العجود

بعض الشوارع موش کلهن گدها و گدود

مثل البشر مو کل نفر يتحمّل الله يکلّفه بهم و جرح

بعض الشوارع ما ينامن للصبح

شارع يحي چي بيه مستشفي و سهر دکاتر

و شارع الخاطر وسعته الحد الصبح يساهر

و شاعر لأن بي صيدليات و تعب مخافر

و شارع لأن بيه الفنادق تنطر المسافر

و الشارع البي گبة حسين

إمنين أوصفه إمنين و إمنين

عين الهوي وحانة العرفان و سکرنه بخمرهالعين

شارع يطيّر کل عصافير الوسن

شارع يخلّي همومي کلهن ينّسن

شارع ترابه يطهّرن ذراته کل ذرات هالمذنب (حس)

و صفوه الي شيوخ بمزارعهم غنه و بيادر

گالولي بي بيدر ذهب و يبيدر المشاعر

ما هو حمام أرواحنه الّي يشهگن هناک بفضا المناير

و آنه امل تعبان و بخلگي جرح يناطر

و تشلبه بضلوعي رعيد و مطّر النواظر

آمالنه العطشانه ، بحسين وهوا حديقه

و زيارته البحلامنه بشبه المحال ، انفاس وي نسماتنه الرقيقه

و الحلم ابنه يعود لليقظه و اخو الحقيقه

بخيالي أمشي بشارع البي گبّته

کلشي الأشوفه هناک بعيوني حله

أتراک لجل زيارة حسين بعمرهم خاطروا

متوقّعين أي خطر عن أمره دروا

أکراد ما هابوا جبال الدرب و علي جدامهم لجله سروا

عربي طرب لحسين و لبلاده طرب

عيمي المحبة حسين يتغنّه بمواويل العرب

*****

هناک اشوفن شوگ ما مثله هوي

هناک اشوفن جرح يتأمّل دوه

بعض العيون الغفن لجله يغبّشن

و بشبه نسمات النخل صوبه مشن

شايب هموم الکبر بيه تحرّشن

شاعر مآسي الهوي بصدره يهبّشن

ثکله و يتامه الما لهم أحّد بعد

طفله ابوها ما حضنها إسنين و عن بيته إبتعد

شارع و بي أرق دراويش و سهر مساکين

فقره بگرب زناگين

حتي اشوفن يعتنوله الما دروا  شنو الدين

نعمة کرامة جود گبة حسين

دلّة الگهوه الروّت الفناجين

ليلي فرد مجنون تلگاه بدربها گاعد

مجنون ليلي واحد

و حسين حسن الله و مجانينه غدوا  ملايين

بخيالي أمشي بشارع البي گبّته

کلشي الأشوفه هناک بعيوني حله

أنظر الزواره و نظرتي مبلّله

و بکربله بکل يوم أشوفن کربله

و حسين أشوفه بيرق مکان الشمس و بکل صبح ، عالي عله

**********

البلّامه

برد جایس بلدنه

و صخِّنَت بصدورنه الچلمه

نستاهد بحضن الشط

رِزِقنه و الله بین الوادم إمقَسمه

رجفنه و رحنه للشط

نِحتمی برِزقه

و لگینه من الحِزِن

گصبات مثل کواوله

عله الساحل مخیمه

بَلّامه و حگرنه المای

و البلّام من یسکت الشط

شیسولف البلمه

و البلّام طبعه یغنّی بس للمای

و من تجاوبه الأمواج

تحچیله رِزِق و البلم یمشی و ینتِرِس نعمه

و البلّام یستاهد مثل الله

کریم المای

مو سِلّیته چانت للبلم تصعد ثجیله

و یرد لَهله ببلم شایل للسِمه خشمه

رجفنه و جرَّس الشط

و المطر ما إجه یشیل الثلج

من چتوف إبن عمّه

عسَّمنه و لا خُبزه تدَفّی بیوتنه

و رِحنه إنتَصبّر

و الحِزِن بگلوبنه إنچیمه

متعوب و أمل منهوب من بلّام

و مخاوی الجرح و تعودله اللچمه

حالوب و برد و بنیّة البلّام تنظر للسِمه

و عیونها مغیمه

حطّبنه النخل کلّه

و حطّبنه الصبُر کلّه

وجریب بلامنه نحطّبها نحرگها لجل عالنار نِتحَمّه

**************

يبچّينی العجد هاذه

يا حسراتی العتيجه

اشمالچ الهالدرب

جبتينی

يبچّينی العجد هاذه

ويبچّينی

و يبچّينی

ضاع هوای و ضيّعنی

و عگبنه أثنينه الضعنه....

الدرب بيمن يدلّينی؟

تحن الروح دوم الهالعجد

وأتصارع ويه الروح

ما ريدن أضيف آمال مجروحه

أمل مجروح

أثَر عمری اشأدوره بهالدرب

و آنه أثَر ممسوح

لَوَنّ الزمن

غيّر حتی البيوت....

اليحنّ الطينهن

طينی

أگِلّّلمَن ؟

أگِل يا باب؟

يِا شبّاچ؟

يا حايط؟

بگربک ضاعت سنينی

شبه آلة الجوزه اصبحت

والشيّاب بس يتصنِّتون

الحِزِن تلحينی

*****************

بکل نظرتک نَبی

*

مِنحِنی بکثر الورِد ، ثُمره ودلع شایل

اینگّع حِسِن بالنهر غصنک البی هادل

کاسک یبو محَبّتی خَمره و صَلَا و نایل

یاطافح اشها لحَلِه منّک عسل سایل

*

لتراب جـدمک أرِش چلمات موّالی

حالی و مو بس إلی الکِل الخلگ حالی

طایر و تهوی الأرض یا حدر یا عالی

إتدولب خیالک عمر و مدولب خیالی

*

وین آنه أدورک حِرِت، بالعالی لو بالتَحِت

بالزرع تنبت لچن بالصبخه هم فتّحِت

طَیّبِت کل ما جرح یالکلّک تجرَّحت

*

تربط مَحَبة الگلب یل للعِشِگ رابط

عِلوَک تواضع نبی یا عالی یا هابط

یا زود کلِّک نَبِع یا صافی یا خابط

*

یا آخر اللیل الکل لیل یتعَیّل

إسمک الثغر الیضوگه بعِطره یتهّیِّل

یا مغَبّش اشچم وصف یم وصفک تلیِِّل

*

من وین جبت الورد یا حِلِم صحراوی

بیدیک حنطه و أمل یا أمل حنطاوی

بشِفتک رضاب الإله الخالقک راوی

*

بعدک چنت مو نبی وبکل نظرتک نبی

چنت الأمبن الرحیم المایذل و النبی

چنت الأهل للأهل و الأهل للأجنبی

بعینک أنوار الإله و کالشمس تصطبی

****************

بلبل الجیران

*

ما عرف روحی ولا یعرفها احد

شجره تارکها ورگها

وکل غصن متبری من عنده الربیع

و سلّب ثیابه الخریف

گوه شایل حسرتی بعودی النحیف

گلبی تایه بالشوارع

لا أهل لابیت عنده

مثل مجنون اللی وکت اللیل ....

ینیّم گلبه بضلوع الرصیف

آنه وین و هلبلاوی الذی....

بدرب العشگ وین؟

آنه گبل اسنین هدّمنی العشگ

من جدمی الحد راسی

خمرتی إنطشت وظل یبلع نعاوی

و وحده یسهر کاسی

جیت تحفر گبری.. یلی ترید

من حلّه وجدیدالیوم تحفر ساسی

انت کلشیّک حلو

بس فرد شی موحلو

ادری جای ترید تکتلنی الصرت هلگد حلو

مو حبیبی انت کل احبابی

یحبابی علیه تدللو

انه مثل الجرح هابط

وانت مثل الگمر وتدور العلو

یاخمر سهرنی والیالک دبس

لون نور العشگ چوانی امس

گلبی من ذیچ الشبابیچ الی....

مابیها ستایر....

تکره انوار الشمس

حلهن زلوفک یاغایص بالحله

حلهن یسهرن ویانه

مایشیبهن سهرنه

لاتخاف اللیل بعده بأوله

جیت تعشگ لوعن الحب

جای تسئل چم سوال

وعضعضت بحشای های الاسئله

مهجتی مابیها حیل

عوف جرحی جرحی بس الله اله

ضم نده ورودک تره تبچینی

وانه خدود طینی بلانده متبلله

یاحبیبی الیحب کون یصیر

مثل البمبره الزاید وردها

تنکت وروود من اجل اثمار باچر

حلو یتبعثر وردها....

بحین تنسل بالضفایر

بلبل الجیران

یشم ریحتهه کل لیله

و جریب یصیر شاعر

********************

شبّاچک

*

من يجبل الليل

و تفز الجروح

خَلّيلی شباچک مثل هالجرح مفتوح

مرّات من تضيج نفسی

اللهفه تدفعنی المحاريک

و العبره تخنگنی بعجدکم

و تصير روحی بفرگتک

خطّافه تعّبها جرحها و صوبک تطير

ما عدها والی

و غيرک المن عودک تروح

خلّيلی شبّاچک مثل هالجرح مفتوح

جرح الگلب

يسئلنی عنّک بالدقايق والثوانی

و أتفگّدَک بين الأغانی

و الگاک

و ما الگاک يَمّی

مرّات يتعّبنی الصبُر

و أحتاج گُربک

وين أنطی وجهی

من أحِن الريحتک

و تريدک الروح

خلّيلی شبّاچک مثل هالجرح مفتوح

**************

دموع بعیون الأغانی

*

یا نَعش حلمی الهویته

یاگبُر حُبنه الیّ فوگه انشتلت شموع الأمانی

دوّرت حبنه ولگیته دموع بعیون الأغانی

آنه سکته البیها ألف حچایه مِلتهیه ویه ذچرچ

آنه صینیّه وتنطرچ

وانتی حِنّه المایمر بحشای عطرچ

چنت أظن من عندی قط مایگدر یبوگچ لمیع البصوانی

دوّرت حُبنه ولگیته دموع بعیون الأغانی

یالقمیص الأسود الما ذَبّه شِعری

یا بیاض الشیب البإید النوایب صبَغ شَعری

یالخیال الگعد فوگ متون فکری

حزنی یشبه حزن صوباط العنب بیّام صِفری

چنت أظنن آنی إنتی و إنتی آنی

دوّرت حبنه ولگیته دموع بعیون الأغانی

یالنسه العِشره الطویله و مانسیته

یالحچی الما مِلّه ویوَنس الگلب کل ما حچیته

یا أذیّة بیت شِعری الّذی بطابوگ السهر لجلچ بنیته

یا دمع ما ینگطع مهما بچیته

یا نخل موش آنه راعیّه وسگیته

صحت وین الشوگ

ولوراگ الشِعر همّچ خذامی

دورت حُبنه ولگیته دموع بعیون الأغانی

****************

...صب يا مطر . .

صب يا مطر

صب طيب اجروح النهر

صب خلي گطراتک تضل تتمرجح إبورگ الشجر

صب يا مطر . . صب یا مطر

يغدي بخيال الفلح من صبک الف شکبان مملي من الثمر

صب و انت حسک نغمه ترفه من الوتر

صب فزز الورده الغفت حــــــــــدر الصخــر

صب خلي تصبح شاعريه و حلوه لحظات السمر

صب طين إجدام الرجع من بگشة الماضي عــــــــبر

إهديه شي من التخيل و الصور

صب بلل زلوف البــنيه إلتـلعب إبراگ النهر

حـن يـــــــا مــــــــطر . .

يکسر الخاطر و الگلب ، حــــــال الشــــــجر

رد یـــــا المسافر و الأرض تــــهواک محبوبه و تود . .

« محبـــوبها إيقبلها من بعــــــد السفــر »

صب يا مــــطر . . صب يا مــــــــطر

جدد الصوره إلبيها إشوفن ينعکس بالهور تصـوير الگمر

صب يا مـــــــطر . . صب يا مـــــــــــطر

کل زخه منک تنحسب شدة ورد و مضمره إبورگ الشجر

صب و انت تـــــــعرف يا مـــــــطر . . .

من ريحة الطين الحنين ، إلعام من صبيت چم شاعر سکــــر

صب يا مطر . . صب يا مطر

***************

نص اليل

*

وتعبانه الدلال تريدتغفه.....

ومايهون عليهه تترک ذکريات الهيل

نص اليل

وخانگني الحزن ويعتني عت الخيل

وعجودالمدينه...

والگهاوی...

والشوارع والمجانین التساهر...

و الانوارالی تحی اللیل

ولبیبان...

والحیطان

کلهن ذکریات وتعصربروحی و تهدالحیل

نص اللیل

ودمعة شاعرتبچی السمه ویاهه ....

وتعده العمرمثل الریل

نص اللیل وآنه بنار

ساعات ویصیرالصبح....

والوادم تفز وتنطفی الأنوار

وجروحی بعدهی عیون مفتوحه....

وبگت عندالسهرخطار

وبلام الشریعه والمراکب و النسیم

وشوهة الشط.....

والنخیل وریحة اللگاح ....

کلهن ولله کلهن ذکریات.......

ومثل غنوه امسهره الأوتار

نص اللیل

وسهران بخمرتی ونایم الخمار.

***************

إلی دین برگبتک فکّدینی

ماقّیّدت إیدک فکدینی

حبست دینی بمحبتک فکدینی

یاعنگود الهوی تخمّرت بیه

*****

شنو بابی الکُبُر دگّه شبابیچ

أفگدنّه وتفگدینه شبابیچ

اذا ببیوتنه إنوضعت شبابیچ

إنوضعت تنفتح للنور هیه

************

وهم ما جیت

*

لهفت الدلیل ولهفت ربعتنه والبستان وباب البیت

عدلت المخاد و وصلت شیبی للمرایه...

وعله کل سالفه بداری عطر رشیت......وهم ما جیت

عرگت رازقیتی وویه ریحتهه اللی طلعتلک تتانی بالعجد تانیت

وامن المغرب اعلی الیال عصفوری صبح فضیت... وهم ماجیت

هلیله الهوه یطیرنی مثل اخطیط محروگ....

و اضوگ امرورت الألام

هلیله اجدی خیالک ونگعد سوه نبچی برد ونچیمّ الاحلام

کلفه وحدی مابیه اتچی العشگ مکسور....

وجریب اعله التراب ینام

شیّب بالگفص بلبل عشگ ...گد مایعاین من وره الشباچ للبستان

لا ورده ولاریحة ورد

حسره وحدید وجام

ضل العمری عشگ ازغیر

گد عصفور اجه البستانی...وتعود عله البربین وبرودت المی والطین....ومایرضه البعید یطیر

ضل العمری عشگ ازغیر ...گد شباچی ..گد اغنیه نعسانه لچن سهرت تصبّر لیل و انواطیر

**************

خایف توگع الشربه

*

کلی ذنوب

وبحلگی جرح مکتوب

یالبحرک غمیج ولاصگ ویالسمه وشابع نور

انه بساحل شما ادوره ظلام رمل هیال وبلم مگلوب

امس شیبی یتطایر مثل لگاحه بمسیر الریح

گلتلک خاف اطیحن......گلت کون اتطیح

چنت صاحی اشخذانی للمحبه ورجعت سکران

شلون امشی عدل.... یاعیدی اتکض ایدی

لو انخه العجد واتچه عل حیطان

خایف توگع الشربه العلی چتافی شلتهه ....

والعنب ینطش علیه ویوگع البستان

********************

ومضات الصباح

*

صباح الخیر اذا واعی

بستانی نگع بالمای وبلل زلف نعناعی

ولو گاعی زغیره وبیتی ضیّج بالمساحه....

الشمس لاکن عالیه وتتسرسح الگاعی

**

صباح الخیر اذا واعی واذا غافی

سمانه امصحیه والشباچ بارد والهوا صافی

والنسمات لاذ ت بالستایر والعشگ دافی

**

صباح الخیر اذا صاحی

خطیّه البارحه الحد الصبح سهّرت مصباحی

گفل بیّه اشمرید یفتحه عاجز خلگ مفتاحی

انا مونایم الحد الصبح...

ارسم شجر تفاح ویذبل ورد تفاحی

 

صباح الخیر اذا واعی

های آخر محطه والقطار من الدرب تعبان

وروایح شعرک الشیبّت لیلی البارحه انطشت علی اضراعی

صباح الخیر اذا واعی

قدرنه اشراعک یعوف البحر ویشیّب شراعی

**

صباح الخیر یحبابی

ما اریدن تظل الریح بس اتصفگ ببابی

وّعت بیه شمس ناگع زلفها بالمطر ویطیّب اصوابی

***********************

الهات

وطن محتل گلبی و انته مستحیل ****و صار تحریره بدیّه مستحیل

چف عذابک مس دلیلی مستحیل ****و هیّض اجروحی اللی چانن نایمات

**********

گلبی یخفج قصده ینسج هاتله ****ها نطق بآیات شوگه هاتله

هات من نهرک یا جرحی هاتله ****چلمه و انهار المواجع طافحات

**********

إخذ گلبی  إشلون متحب دله له****و ثمر نخلاتی إعله کیفک دله له

کلمن ایحبنی و یودنی دله له****تصب فنیان إلرسوم الشامخات

*********

همّی موجز منه تسمع ما یلی****مال حملی اشلون أعدّل میلی

یبس جود الچنت اظنن مایلی****و شح علیه البیدی دلیته النجاة

**********

الذّی ابلیل المدینه اسنین حی****کیف یقبل للحرامی ایبوگ حی

للضمیره ابهلوکت مو میت حی****ما هی مرّه اسوالف الحگ حالیات

**********

یهلنه المغل دم دمعی یهلنه****یهلنه الیهل ما خلّه یهلنه

ابعجل ردّو الاصالتکم یهلنه****گبل لا ینگطع در المئاب

**********

الذی ابلیل المدینه اسنین حی (حای )****کیف یقبل للحرامی ایبوگ حی

للضمیره ابهل وکت مو میت حی****ما هی مره اسوالف الحگ حالیات

**********

انا و کل عاشگ اللايم لامنه****او بنحيبي اجروح تنحب لامنه

لا منال اليوم يمي لا منه****يمي دمعاتي الجرن دجله و فرات

*********

اي یروحي اللیل یَاطیب روحلي****روحي راحت روح حضّر روحلي

من اعماق اللیل جمع روحلي****بچفک اشویت شعر مو قلمي مات

**********

المیمر

فر من جریمة جورهم شاهدنه ****نشکی الجریمه و لا عدل شاهدنه

قاضی وکتنه لو طلب شاهدنه ****ما عدنه شاهد غیر الله الاکبر

********

زور إللی نایم بی سبع من طیها****لن شال حاتم یا ربع من طیها

روحی الودادک یا مجد منطیها****و منذور دم لجلک لون تتمرمر

 

**********

یلعندک اشفایف تحن لمحمره****من دمنا لخدود الوطن لمحمره

فرحت عرس اخت الشمس لمحمره****و خد الشعر بسم المحمره اتحمّر

**********

إی یا نجات الکل وکت منجالی****ضیک ترک حزن الغسق منجالی

شفت ویه نورک یا وصل منجالی****أسمر اجه و نوّر غروب الأسمر

**********

گلنه الهنه انته و بينت منته اهنه****تهنه و قدر بينه الوکت منتهنه

مو ماشي بدروب الفشل منتهنه****يمته و مثلنه بکل کتر تتعثر

**********

لو وکتي طيب چا گلت عن طيبه ****بلسمک يسمر علجرح عن طيبه

تم ثوب شعري المنفصل عن طيبه****ممحل عگب ما چان خامه امشجر

*********

یا کاس چم فیة خطر ماشیلک****وغیر إنتعاشي وسکرتي ماشیلک

وحدي اشیلک یاقدح ماشیلک****وما جرعک الصاحب لون مایحضّر

**********

العتابه

النزل مشلول وشجم زند شلبی****ومعیشتنه جرح ما وگف شلبی

ما  اهجر  اموتن مثل  شلبی****وشلب ما ادور بحضن السراب

**********

آهي من السگم يهواي کاهل****صبح من قسوة الايام کاهل

يظالم يل سبيت احشاي کاهل****الگلب موته و دفکني من العذاب

**********

یــَامنه الجفنچ إلیالي بکلنه****اببعضنه ما سکن شوگچ بکلنه

ابشربنه ابچاینه ابمینه بکلنه****یلوح اخیالچ امحمّل اطیاب

**********

الابوذية

اشکثر لحروف ابچیهه ولچ لام *****والچ سین انطبع بیه ولچ لام

الچ طشرت اوراقی ولچ لام****حچی ابگد البچی المحتصر بیه

*********

عجب صوب النکر حگی لخنجر****و تابوت الی و للخوه لخنجر

الغدر یحتاج لو نفرض لخنجر****الخیانه اترید اخو ایخون ابخویه

**********

انچوه چبدی ابظرام الگلب بل شاب****إلتفتلی و شوف فعل الشیب بل شاب

موبس شاب شعر الراس بل شاب****رمش جفنی الینطرک ترد لیه

**********

حگی الحللو اکله کلو نی****کلیت احگوگمن حتی کلونی

اصبح لون موالی کلونی****باهت و الاغانی انطفت بیه

ال الاهه الحب یسبب تعبدینه****شکض ایدچ الضیعت تعبدینه

لو دین الاعبده تعبدینه****لو نکفر ابهاذ الحب سویه

**********

یصاحب خابن اظنونی و خابل****امل و مسودن اتوصف و خابل

أسف للیندعی مثری و خابل****عسر و امگیده اچفوفه السخیه

*********

یماضی کون اکتبنک یمسکون****هلی چانو ابشباچک یمسکون

مگام و بیک الف جنی یمسکون****لأن عفناک صرنا بلا هویه

*********

حن یا شعر لهلک منحنینه****العرب و الغیر شخصک منحنینه

الجمل ماطول میفک منحنینه****العرب ماتفک من الشعر هیه

*********

إشمگله ابطیب وصلک علی منما****یمن و یفک جفن غرگان منما

اظل کلیوم أشوف الموت منما****یحن ولفی  و یمن بالگرب لیه

**********

یشعری شکتل اشواگی شکتلک****اکرهت نفسی العن احوالی شکتلک

الک کتیت ضی عینی شکتلک****بعد مونشف جفنی و خلص میه

**********

یماضی کون اکتبنک یمسکون  ( یا امس کون )****وهلی چانوا ابشباچک یمسکون

مگام و بیک الف جنی یمسکون ( یا مسکون )****لئن عفناک صرنا بلا هویه

**********

کلف درب العمر نص سوء نص بر****یشوّفنا الدرب نص بحر نص بر

اشگد نحمل یعگلی اشکثر نصبر****گطن شیبی انّدف بید الأذیه

**********

یفرخ المطر کف لا تصب یلما****اخاف الترف صبک هاذ یلما

اموتن من حبیبی ایلوع یما****تحس لجل الولف شیصیر بیه

**********

گلت فخ عشگ لگلیبی متنصب****صبته و لا دریت آنه متنصب

نبیذ الشوگ ما ادری متی انصب****ابکاسی و داخ راسی و عمل بیه

**********

خلف خل محن خل عشره خلف راح****خلف کاس اللی سکرنه خلف راح

خلف لو راح چا طاری خلف راح****خلف حی لن طواری خلف حیه

**********

من هو النحی من اجل الخیر منحاک****یا حچی الفهم عل صخر منحاک

لو لا اخیوط شمسک صبح منحاک****و لا لبست الغبشه اثیاب ضیه

**********

اشکثر منک شفت يفراگ لوعات****اسلوبک لو طعن بالگلب لوعات

مو کافي و حتي الروح لوعات****مرامک و التريده صار بيه

**********

اللچم باشعاره جرح المات کلفات****چبدته ابنفسه و اللچمات کلفات

باجي العمر هم تعذيب کلفات****الحياة أصعب من اللچمات هيه

**********

ما أدری الشِعر ألمن هوی اللیل****لچن الکل دروا ولفه هو اللیل

مثل شبّاچ یتنطّر هوا اللیل****هویت آنه هواکم یمر بیه

*********

ما ظل خضر ، جف الگلب شف هم****فرح ما شاف شاف امصاف شف هم

ما افهم معانی الفرح شفهم ****و أنه ادرس أذه بمدرسة الاذیة

********

بشرارة حب دليلي التهب همّا ****اشمريدن ما يهمه الشوگ همّا

هم گلبي يرف للعشـگ همّا ****بعد للعشگ يوجد حيل بيـة

**********

دش الشيب بغباره شعرنا****شباب و بالمشيب احنه شعرنا

شايب منحني ظهره شعرنا ****و عصاه الوادم التشعر اذيه

*********

صوارم غضب من عیني متنسال****علیک المسئلت جسمي متنسال

یلّي احلفت بالکعبه متنسال****یحبّک چیف مالک عرف بیّه

**********

ماشم غیر خدخلّي مقابل****سوی اجدامه الذي ابحبي مقابل

انطي اسنین من عمري مقابل****ثواني اوصال ولفي الگطع بیّه

**********

المصادر:

مدونة فلاحيتي

مدونة من يحب الفلاحية

و ارسال شعره الاخ المبدع محمد الاميري

نشکر الجميع کثير الشکر

کل الحقوق محفوظة لموقع ادبنا

TPL_KH_LANG_MOBILE_TOP TPL_KH_LANG_MOBILE_SWITCH_DESKTOP

مجوز استفاده از قالب خبری ناب نیوز برای این دامنه داده نشده , براي اطلاعات بيشتر درباره مجوز استفاده از این قالب به سايت خليلان رسانه مراجعه کنيد .