موسوعة الادب العربي في خوزستان

TPL_KH_LANG_KH_MOBILE_DESKTOP TPL_KH_LANG_KH_MOBILE_REGISTER TPL_KH_LANG_KH_MOBILE_LOGIN

الشاعر المرحوم طاهر السلامي

المرحوم طاهر السلامي الشاعر المرحوم طاهر السلامي ابو شاکر: شاعر من شعراء الشعر الشعبي في خوزستاني ولد في خرمشهر (المحمرة) مدينة العلم و الادب و الثقافة، ترعرع في عائلة دينية اصلية فکبر على محاسن الاخلاق و حب اهل البيت عليهم السلام و تعلم من بيئته العلم و الادب فاصبح شاعرا کبيرا التحق بجمعية الشعراء التي کانت تضم کوکبة من کبار الشعراء في المحمرة و کانوا ينتمون الى البيت العدناني فکانوا يجتمعون في المناسبات الدينية خاصة في مواليد و وفيات لاهل البيت عليهم السلام و يحيون تلک الايام المبارکة بشعرهم و خلفوا ورائهم تراث ادبي هائل سوف يصبح کنزا ادبيا في المستقبل، تفتخر به الاجيال الحاضرة و الآتية کتب الشعر في مجالاته کافة و اوزانه و فنونه المتنوعة کابوذية و الموال و الميمر و الهات و الهوسة و القصيدة و غيره من الاوزان. شارکت في کثير من الاجتماعات و الندوات الادبية في خوزستان و سجل منه کثير من افلام تشهد على قدرته الفنية في النظم و الاداء حيث کان يمتلک قدرة بارزة في القاء الشعر و کان فارسا للمنصة الادبية، يسيطر على الجمهور ببرائعة و روعة، يسغي لادائه المستمع بشوق و لهفة، و ذلک لاصالة لغته و عذوبة کلماته و جمال صوره و خياله. کتب شعرا کثيرا لم يجمع في ديوان و مخطوط الى الان. توفي على اثر حادث سيارة، هو و بعض زملائه الشعراء في طريق الاهواز الى المحمرة و التحق برحمة الله و خلف تراثا ادبيا يجعله حيا في قلوب محبه و مريديه لا ينسى ابدا.

 

من شعره:

مدح ابي الفضل العباس:     

على مهدک يطل الشعر ويلاگي الوفه عاليمنتک و الغيره عاليسراک متوسده

و الخوه المهد سيدي و يهتز بيک ما دامک ابطنه محد ايرکده

امک رادتک تطيح بلحظه العين و اتگمطک حتي مهدک اتسبده 

شيوگفک يا بحر و الموج هايض بيک تجدح موجتک من تلطم امزبده

و حارت يا گماط اللي يلف زنديک زندک زند الله و زند الله شنهو الي ايشده

اشگد سهرت احذالک زينب او يالليل و چفک علي چفها تنام و تسده

و من تصحه تمش دموعها ابإيديک و بيديها تنشف دمعک النده

تفز تلگه الحسين و طوله صار اغطاک و بين اخدودکم بالحب وضع خده

و من خدود الحسين الترهش من النور علي خدودک تلاگي مخضره ورده  

و شعاع وجوهکم نورين للکرار واحد و انعزل و انجمع للشده

حجاب اصبح الزينب من عيون الناس و اعز من هالشرف يم زينب اشبعده

**********

تطلعک بالمهد ام البنين تگوم تتباها بجمالک عالگمر و تناشده اشعنده 

نظره للگمر و ترد الک نظرات و گد ما انته احله تگوم الک بالروح تتفده

و تگله يا گمر خدينک انته وين و وين خدود ابني بلونها امورده

هذا ابني اله يوم بصد الکلفات للصفوف الخبيثه بزود يتصده

و انته يا گمر تردس علي الکاروک مستعجل ينشمي الساعة الهده

و گنطرتک ضلع من حومة الکرار خل تنطق حدرها اشلون ذيچ الزلم متکوده

و الله ولو طلع سيفک بتشييع الحسن مولاي چا گص عيب اميه بلمعته و قده

اشاره من الحسين و رجع طب لگراب و ضم لمعة فتنته الساعة الشده

يا هوسه الختضت بيها سوح الکون او ما خلت درب للنوت للشرده

من جيت الحسين و عاينک بالعين شافک علي بعينه تشيل کل مجده

نطاک الرايه و من اهتزت ابيمناک رجف نخل الطفوف و خضع للسجده

و من سمعت رفيف الرايه اختک جت شافتکم اثنين اجساد لاچن روحکم وحده

گلبها فر عليک و عينها اعله احسين من عزمک تعکر حاجبه ابجعده

الها اتلافتت و الفي افتر اوياک و حضنها افيايک انته بروح الموده

لنها وي لفتک  خرت اعله الگاع مثل ماي التطش برمل و تبده

شلتها و الفرات اصبح  الک مگصود و منو يمنع فرات الشخصک ايگصده

غرت و الخيل گامت تسحگ اعله الخيل و السيف ابتراقي من العده اتحده

و خيم طولک اعله النهر يا عباس و رمحک يرعد بچبد السمه رعده

وجودک من ترسته من النهر مولاي گام النهر منک يشرب المجده

انگلب بالجود کله و ما بگه بي ماي و طفح جودک تگول صبحت بي مده

و انته من انزلت من المهر عباس مو طيحه نزلتک ذيچ گصدک ربک تعبده

و حين الطاح جودک سال منه الماي وصل للخيم رويه و حسوا ابرده

الهذا الخيم کلهن خضر صارن حين اختلط دمک وياه وعذبت ورده

قصیده ماضی اهلنه:

أحس ماضی أهلنه ابحاضر الحیّین

مستقبل اجیال اتعیش بظلاله

العاصف ماخذاها ولا کنسها الریح

جبل شامخ تلوذ الخلگ بفعاله

هلی گمرة لیالی السود

 جدح حافر شگرهم بیها یتلاله

هلی یا حید منهم لو یطب الکون

یضل یتلمّض أعله الموت عساله

هلی سنبل خضر ما یبساه الصیف

ولا طاح ابرحه وطحنته الگاله

هلی رمز الچفافی وبشت بدری اشیوخ

او فوگ من الچفافی العگل میاله

هلی سادت زلمها وساست المخلوگ

اولواها احسین یوم المعرکه شاله

هلی یشهد لهم تاریخ

بی تفخر هله وتتنومس ارجاله

هلی یاهو المثلهم لو عطت یمناه

تظل تسبگ عطاها ابجودها اشماله

هلی بالکرم حاتم ما لواه العوز

یشرک ضیف بیته ابلگمة اعیاله

هلی ضلعین بیها الکرخه وکارون

رزق طر الارض بجنوبه وشماله

هلی بیهم الکسَر جدم یسره الضیم

یتچه أعله رمحه وما شکه الحاله

هلی تمثال أباها اعله المجرة انشال

الخلگ تسجد اله من اتشوف تمثاله

هلی راس الجبل چل جدم من یعلاه

وکل خیر الارض من زود شلاله

هلی لو صار عزها أعله الشمس یاناس

بخیوط الشمس کلها اتشلباله

هلی سورة علمهم بلعت الجهُال

وصار العلم فوگ اخدودهم خاله

هلی فنهم نبع صافی وشعرهم شیّم الشیمه

لوّن شد ابوزّن رباط مواله

هلی ابغیرة شرفهم صانو الناموس

وگصّوا راس من راد ایتدنّاله

هلی غزّر ملح جیرانهم بالعین

ولا بیهم ابیوم الجارته من إلحسّن تحلاله

هلی اربات النخیل ولذٌّت الگنطار

هلی المگوار الها وشچت الفاله

وهلی کلشی هلی چانت

 علی احلوگ التفگ تمشی

او هلی منها الیطیّحه الموت

بس ما طیّح اعگاله

او هلی منها الیطیحه الموت

بس ما طیّح اعگاله

و له ايضا:

ماطره الساني ابغيرک ماتله

اوگلبي موکلمن يشوفه ماتله

مات الک بس انته گلبک ماتله

يم حنان اوحب حبايب هاويات

*********

شایل اگلیبی اعله جفنی و نتبه

و لجل لایزعجک ضلت و نتبه

دیر بالک  من اهمومی  و نتبه

لا  یحرگنک   تراهن   حارات

*********

  گلبی یا صاح  بغیابک  ونه بی

و الزمن  تنور  صایر  ونه بی

اهوای اودک قسم بلحر ونه بی

وقسم بچفوف الهون یم الفرات

*********

القصیده الأخیرة للمرحوم طاهر السلامي

ظل بالعین لتحل باب الجفون

الماینشاف احسن یبگه غالی

یالاسمک دمع اهیبلک اتغیب

بس تظهر یمسحک ردن بالی

من عین الجبل لو ینزل المای

یشربه تراب سفح الجبل تالی

الگمر نصین نص بی ظلمه نص نور

موجود وتظم نصه الیالی

لاتحله تطیح تروح ماکول

عله حالک دظل وابگه عالی

حموضه البالعنب تبعد للسنون

تلوچه بس یصیر العنب حالی

عله چتف الجبل یالشچره زرعوک

العلو ماهو الک لتگول مالی

خال وعله الخد والخد حله ویاه

الخد ایگول هاذ الخال خالی

ردت تکبر نهر اصبح للاشجار

حتی تگول حال النهر حالی

الحب مادام بیدک طایر الطیر

یحط لو صار چفک لجله خالی

من تخدم الناس تشیلک عیون

وتعاینلک تگوم بعین والی

النخله بکلشی بیها تخدم الناس

الهاذ النخله عدها راس عالی

عله بالی سوأل وشاده البال

وینه اللی یجاوب عن سوألی

اللسان شبیه یفضح سر الگلوب

من ایجاوبنی حتی یریح بالی

اذا چفی فضی یا قاری الفال

یلزمه بچفه حتی یشوف فالی

احط ایدی بجیبی ساعت العوز

حتی لا یبّین یوم خالی

اذم کلمن یگول اتسند ابمال

واحب کلمن یگول العگل مالی

ماشافو دلال بملک قارون

وملکت الحب انه ورعرع دلالی

واحد سیفی بجگاره وصفنت الیل

ومن صلیله اعرفو صولت نظالی

وعرفت السیف من عسگات العثوگ

وعرف الگصب ورماح العوالی

وعرف الغاب وجهه بساعت الماو

وعرف الجدم والظل بالتوالی

وانا بوصط المطر شترش علی مای

جامه وضیمی بیّن من خلالی

عله الواقع ثبوت وعینی علیه

ولا عیش بأمل عالم خیالی

تظم ما تظم یا غیم البالغروب

هم یصبح گمر تالی هلالی

الرسن بچفوفی لنی بظهر الکحیل

شوکت ما اشتهی اخذ مجالی

شوکت ما اشتهی اخذ مجالی

کل الحقوق محفوظة لموقع ادبنا

TPL_KH_LANG_MOBILE_TOP TPL_KH_LANG_MOBILE_SWITCH_DESKTOP

مجوز استفاده از قالب خبری ناب نیوز برای این دامنه داده نشده , براي اطلاعات بيشتر درباره مجوز استفاده از این قالب به سايت خليلان رسانه مراجعه کنيد .