موسوعة الادب العربي في خوزستان

TPL_KH_LANG_KH_MOBILE_DESKTOP TPL_KH_LANG_KH_MOBILE_REGISTER TPL_KH_LANG_KH_MOBILE_LOGIN

الشاعر توفيق ناصر النصاري

الشاعر توفيق ناصر النصاري

الشاعر توفيق ناصر النصاري: شاعر من شعراء خوزستان ولد في مدينة شادکان(الفلاحية) عام ۱۳۶۹ شمسي نزحت عائلته من مدينة عبادان الی الفلاحية بعد اندلاع الحرب الايرانية العراقية عام ۱۳۵۹، دخل المدرسة و اکمل الابتدائية والمتوسطة والثانوية في مدينة الفلاحية و دخل جامعة آزاد الاسلامية في ماهشهر و بفرع "هندسة البتروکيمياء" عام ۱۳۸۸شمسي،حفظ الکثير من شعر الاستاذ الکبير الملا فاضل السکراني و يعتبره اول استاذته في الشعر و بدأ کتابة الشعر عام ۱۳۸۷ شمسي، حيث کان يجتمع هو واصدقائه في الصف بعد انتهاء الدرس و يقومون بقرائة الشعر و هذه کانت نقطة انطلاق له في کتابة الشعر و کذلک شجعه في مسيرته الشعرية الشاعر ابونزار الجنامي من کبار شعراء الفلاحية و کان يلتقي به في حوش الحمر (مظيف بني کعب) حيث کانت تقام جلسة شعرية بعد المجالس الدينية. کتب الشعر في اغلب الاوزان والمجنسات في الشعر الشعبي کالابوذية و الهات و الموال و الدارمي و الميمر و القلايد و کتب قصائد النثر.

 

من شعره:

القصائد

انتَّ امنين ؟؟

آنه من غيره المشت بعروگ قيس

آنه من صينية عيوز الچانت ابباب المدرسه اتبيع هيس

آنه من دمعة يتيمه

ماذکرهه الشاعر ابشعره

وظل يکتب غزل

هيچ ارضاب ولفي هيچ

آنه من بسمة سليمه

آنه من ضحکة طفل

اتدقدق  ابإيده التميمه

آنه من ورگه انشگت امن إکتاب

آنه من تفاؤل شاب

آنه من صفنات شاعر يعشگ ابيات العتاب

وکلما يسئلونه عن الحب

ايچنف اذراعه و ايگول اگروا يعمي  الحب عذاب

آنه من نگش چفية ابوي

الماتذب سوي

وماتبدل لونهه

وبيهه ريحة يَدّي الهَسه تفوح

آنه من حيرة فقير

رابي بدّير الفلاحيه

شفته بالأهواز يفتر

ويهه اصفر

گتله عمي اشعدک اهنيّه

وگال بت عمک مريضه  وجاي ادور عالطبيب

والحقيقه السان ماعندي

آنه من تعب کادود رد امحمل الأهله

محنّه و عاطفه وتکّي

آنه من  أتراح  شاعر حتی ليگولون هذا امغندب امن اسنين

بيّنت رصعه اعلی خدّه

و مادروا گلبه يگول :

ورده  ورده

ذبلت  اورود  المودّه

آنه من محنة عيوز

اتلملم اهدوم القديمه ومنهن اتسوي مخدّه

آنه من حنجرة شاب

کلما اطب للسوگ يم يسر الفلاحيّه يصيح :

ادهون وريحه

هيل اوبَستي

أنه امن الخور والطرّاد والميناء والسفّان

أنه امن الهور والمشحوف والخرّيط والبُرهان

آنه من گعدة شباب

بيهه ناقشوا وضع البلد

آنه من عشيرة « موش»

و «إشکون »

و «لَعَد »

احچي بعد ........ احچي بعد

****************************

« بنات الجامعة »

اشگد دوريت

مالگيت اعيون متکحله

ماکو سمره احچيلهه ابيوت مهداوي

وگعد اوياهه دقيقه ونبتسم

ماکو وحده اتگول « چا »

ردت وحده تتلفظ « لعد »

اهواي احب اسئل فتاة

عن مفردات

چانن ابديرة أهلهه ايعطرن اجواء المظيف

وهسه ماتن

دورت کل الصفوف

ردت بت امن الفلاحيه اگلهه

اشلونهم اهل الفلاحيه – يِرنّون -

وصلکم ماي

لو بعده  الماي مسدود

بعدهوا الهور؟؟

بعدهوا البني ايغازل الشبوط ؟؟

لو يسچب المشحوف عبره

ويحن الگذلة البردي

وثغره ايحب رضاب الهور

احب ديوانکم

احبن بيت ابوذيته

واحبن بيت مواله

ملافاضل ملافاضل کيف حاله ؟؟؟

ردت وحده ابحيّة الکراسه اگلهه امنين انتِ  ؟؟

دمچ اهوايه يشابه اهل المحره

البيرق الرفعوا عمامچ

بيرق الوحده

بشريني بعدهوا بالسلف منشور ؟؟

انتو اعزاز عندي اهواي اريدنکم

هم الغيظ هدّم بيت بسمتکم ؟؟

عين الوحده خبريني بعدهي اتشوف ؟؟

لو حِيّه إتوچد

وتذکر ابعبره زمان الحور

ذمه برگبتچ

وصلي سلامي الحسن عاشور

ماکو وحده من اهل عبادان اگلهه

اهلچ شيّدوا تاريخ إلنه

سترة يدچ الماصار عنده اوليد

وين راحت ؟؟

اکيد مکويّه وبعدهي امعطّره ابعطره

واکيد ابجيب هالستره ظلت ورگه بيها ابيات ابوذيه

يبت عمي اشلونهه – الفيّه -

احب شط العرب لو غاض

احب احضن شوايطيه

ردت وحده اوياها اسولف

عن سوالف قيس لبنی

وقيس ليلی

وعن سوالف فيصل ونوري سعيد

مالگيت ... مالگيت

****************************

"تعالوا"

تعالوا نشتل اورود الأمل يم بيبان ديرتنه

تعالوا حتی مثل اوّل ترد عالشفه بسمتنه

تعالوا بس نسمع اجيتوا اتروح علتنه

تعالوا ننثر بذور المودّه ابگاع خوتنه

تعالوا انگطّع أشجار القَساوه ابفاس رجتنه

تعالوا إنلگح ابريم السعاده ابطلع عشرتنه

تعالوا ننشگ بخور  السَّمر من عيدان گعدتنه

تعالوا نرشف ارياگ الفرح من شفاه لمتنه

تعالوا حتی مثل اوّل ترد کل ليله  بدوتنه

تعالوا حتی مثل اوّل ترد وتزود نخوتنه

تعالوا انطفي نيران الوشاة  ابماي وحدتنه

تعالوا حتی من تين المحبّه تنشحن سلتنه

تعالوا حتی من هطل الأبوذيّه نبخ تراب ضيجتنه

تعالو مو خرز العمر لظمته والله اخيوط حيرتنه

تعالوا زلال احنه وأيادي الغيظ خبطتنه

تعالوا حتی وحده اتصير مو الفين چلمتنه

تعالوا حتی بسوالف أهلنه نسهر ومنعوف جلستنه

تعالوا والله نيران الضعف حرگتنه حرگتنه

تعالوا ياهو ايگول هينه موهينه  رزيتنه

**************************

« هم يجي يوم »

هم يجي يوم ازور الجامعه

و ألگه نسيم وغاده

حدر في النخل يتغازلون

هم يجي يوم اشوفن دار فرحتنه

مظيف اتصير

وبعد ما شوف بيهه امخضر العاگول

هم يجي يوم

اگعد امن النوم

واسمع التغريد بلبل

رد يغرد بالمدرسه اليمنه تصير

هم يجي يوم بخدودي تشوف الناس رصعه

بس رصعه حقيقيه

وگصة محمد طرگهه ايروح

هم يجي يوم ارکض ابکل الشوارع

اطرگ البيبان

ولو طلعوا الوادم

ما ادري شگول

************************

« ثاري »

ثاري من إگريت قصتک

يالدخت بوصاف ليلی

ابلاحرگ وانصاف

چان

ثاري دمعي ابيوم قلمي

اتکسّر ابويه المعلم

ماي چان

ثاري دمعي ابيوم عودي

إعليّه صيّح ماي چان

ثاري من غنّه رياض

الفرگة المحبوب موش الحان

مو چلمات چان

ثاري من حفظيت بَشعارک

يسعدي

ورددتهن للمعلم بس حفظ چلمات چان

ثاري لومي إعلی الفتی المکسور

گلبه امن العشگ

هذيان چان

ثاري من إحچيت جرحي

وگمت اسولف هيچ جرحي

طرحي مو معقول چان

******************************

مقاطع قصيرة

***

ياحبيبه

انتي نثر

فجئه حطولچ قوافي

وساوو الأشطر

واشويّه اشويّه وزنوچ

والنقاد عرفوا بالقصيده املهمده

بس للأسف هزّوا روسهم

*******************************

« ماني زين »

ماني زين

بس اگلک آنه زين

حتی لاتسألني ليش

وبسرعه اشوفن ثغرک الباسم يگول :

لو انت زين آنه زين

*******************************

« ابليله هندس »

ابليله هندس ين عليّه الريح

الدنيّه تمطر

العجد يصفر

والمرازيب العتيجه اتير

ابهالرعيد

وين يعرفني سعيد

الملتوي حدر الحبيبه ومستريح

ابليله هندس ين عليّه الريح

******************************

اليظم بفلوسه خايف ينگص المال

يعيش ابغير راحه ويفنه خسران

شبه العنده يغمة ماي بالبيد

عزيزه ماشربهه ومات عطشان

******************************

« شعر بنات  »

گبل عشر اسنين

زلمه اسمر

چان ايصيح يوميّه الضحی :

شعر بنات....

شعر بنات....

ابگد شعر کل البنات

چنت احب شعر البنات

چنت ابچي حتی ينطوني فلوس

ولو سمع بچيي چان يوگف

چان يعرفني

يدري دمعي ايفک حلگ چيسيّة امي

ولو اجيته چان ايگلي:

والله نشمي

بعد هالغيبه الطويله

وبعد کل هاي السنين

شفته امبسط ابديره غير ديرتنه ويصيح :

ديرم ....

ديرم ....

بخور ياوي ....

رحت صوبه وگتله عمي :

والشعر بنات اشصار منّه

رد عليّه يا شعر بنات !!!!

*****************

الابوذيّة

ابهلالچ ليش شلتيلي يورده***عودچ ماردت کسره يورده

يورده ثغري حب شهدچ يورده***شنو المانع دگولي ابهالقضيّه

**********

اندرع درع الصبر بجفاک وانشگ***وعن حبک محال اعتزل وانشگ

لو تلمس يمنتي الخصر وانشگ***عبيرک مايظل کل مرض بيّه

*********

کتبلچ من سواد العين قلمي***شعر افراگ منه الشوف قلمي

يشعري البيّضيت العين قلمي***مي السببت  کل الأذيّه

********

لسانک يبو عيون الدعج  قلبي***اودک مو دلالک حيل قلبي

ابلحظک لاتحارب صلح قلبي***ارموشک تهزم اجيوش القويّه

********

شعر فرحي يناهي ادريت حتمن***هجرک بيمن احلف بيش حتمن

اصبر گلت اجيک السبت حتماً***اشو عمري انگضه وماجيت ليّه

********

شبه گلبي مظنن گلب ينهام***الغيري لو سده الياعلي ينهام

عوی ابخلفي ايتعلی واسد ينهام***امامي وکل مفر ماشوف ليّه

*****

انگطع حبل التآخي ووصعب شدّه***وذبلت من ورود الگلب شدّه

الحقد ياصاح تدري اليوم شدّه***عادي صار اخو ايطبر خويّه

*****

الاخو ليش ابرمح بغضه لخوشک***وبيّن بي حقد ماظل لخو شک

ماترکک واعوفنک لخوشک***يل تسري اويه خوتک مسره حيّه

*****

تنور الچذب يسعد حمدنه***وشوف اشلون متغير حمدنه

امس من چنه يم راهي حمدنه***شتمنه اليوم عد ناهي سويّه

******

فز بالفز يجيک الفوز موشب***کری واطفي سعير السلف موشب

عاگول الجهل ياحمد موشب***درايّه وسير صوب الأريحيّه

********

اليابس ماتفيده الشمس شرّب***ناگع والعدوک زهر شرّب

صيّح يا سعيد الجهل شرّب***گصته ورايد ايذبنه ابهبيه

*********

يبس بحر الحقيقه ومات نونه***وصارمنه ابغمد ذل نام نونه

قلم حگنه چفو ياحمد نونه***واحترگ قرطاسنه ابنار الأذية

*********

خزرني وخله مشيي العصر يختل***الريم وصار شوگ الگلب يختل

شــــفت للريم کل صيّاد يختـل***وأنه امحمل شراييني بديّه

*********

يَاقاسي درتخي وبعجل ليلين***يغدي الليل لو فرّعت ليلين

مد ايد الوصل وابتسم ليلين***صدودک ياب بس المرض ليّه

*********

لسانک قُل يالأغنج قُل قلبي***اودک مو دلالک حيل قلبي

ابلحظک لاتحارب صلح قلبي***ارموشک تهزم اجيوش القوية

**********************

العتابة

العشگ چم باب من العگل سکّر***العشگ مُر وعليه ثياب سکّر

العشگ بالليل چم اوليد سکّر***بحديثه وماصحی الحد الضحی

**********

هم گلبوا أنه المابان گلبي***أنه الجسمي بجفاهم حيل گلبي

اذا طوّل عذاب البيه گلبي***هام الشوفهم واهمه العذاب

*******

ها جسمي بغيابک   سار هاکل***وها نصي انضرم حسرات هاکل

يسمر يالفراگک طال هاکل***گلب وبلبّتک علگه سخاب

******************

الهات

جسمي من صفنات هجرانک خدر***والصبح بجفاک يمدلل خدر

ليش ايحجبک ياترف عني خدر***وانت تدري گلبي خدرک يانبات

*****

چنه جدجد من نسولف هسلف***وحده چانت کلمة اهلي هسلف

انترس فتنه ومشاکل هسلف***والعدل ماظل يخوتي العدل مات

*********

ياحمد شجر التخاذل يمّره***ولاتذيع اسرار اخوتک يمّره

بالثگل نخل السفاهه يمّره***ياحمد تعرف عثوگه امغبّرات

**********************

الدارمي

گال اوصف اشما بيک وکت الوصف حان***اشلون اوصف ام کلثوم واصحابي طرشان

*********

رحموني لاترحون لو رحتوا الروح***ترحل واظل عالگاع لو رحتوا مطروح

*********

لاتخلف الميعاد بسک بعد توب***ماواعدت عرقوب اسمع يمحبوب

*********

کلما دليلي بنار هجر الولف وي***شوگ الوصل ياصاح بخ بخ علی مي

****

ماينحگر ياصاح لتگلي حگرا***چني ابلذيذ الزاد لاگيلي شعرا

********

لتگلي بيّه اتخون و وکت الهجر حان***شفت السمچ فديوم ويّه البحر خان

*****

ياگلبي حيل اوياک ظل انضرم شوگ***مو گتلک آنه ارجوک لاندخل السوگ

****

حطني الدهر مابين سندان الهموم***ومطارگ الأحباب مو حگي لو لوم

****

بالدنيّه شفت اهموم چايمته ارتاح***حطني الدهر مابين أنياب الأتراح

****

دب بيّه طيب اهواي من دگ دگ الباب***وسيف العزم من فات ظل يهوی الگراب

****

عجزت فُلُوس الناس اتسوي امرين***تبعد يَصاح الموت و ادنّي گلبين

****

بس بالأبوذيّات يحلی سهرنه***يحبابي چنّه اليوم ماسخ سمرنه

****

لحسين أنه اتعنيت اديَّن أفراح***شفته العصر مخنوگ بيدين الأتراح

حسين : احد اصدقاء توفيق

****************** 

کل الحقوق محفوظة لموقع ادبنا

TPL_KH_LANG_MOBILE_TOP TPL_KH_LANG_MOBILE_SWITCH_DESKTOP

مجوز استفاده از قالب خبری ناب نیوز برای این دامنه داده نشده , براي اطلاعات بيشتر درباره مجوز استفاده از این قالب به سايت خليلان رسانه مراجعه کنيد .