موسوعة الادب العربي في خوزستان

TPL_KH_LANG_KH_MOBILE_DESKTOP TPL_KH_LANG_KH_MOBILE_REGISTER TPL_KH_LANG_KH_MOBILE_LOGIN

الشاعرعیدان شلش سعیداوي

الشاعرعیدان شلش سعیداوي

الشاعرعیدان شلش سعیداوي ابو رضا: شاعر شعبي من شعراء خوزستان ولد في مدینة سوسنگرد (الخفاجیة) و ترعرع بين اهلها الکرام و تعلم منهم قيمهم الاخلاقية و نهل منهم صفاتهم الحسنة و عاداتهم الموالية و لهجتم الريفية الاصيلة حيث يعد الريف معجما لغوي اصيل یمتاز من تعلمها بصفاء المفرادت و سهولة النظم و حلاوة الکلام. بدء کتابة الشعر في مبکر عمره و نظم الشعر و هو ابن اثنی عشر عاما و تفنن في شتى مجالات الشعر و مختلف اوزانه حتى کتب کثیر من الهوسات و الدارمی و الابوذیة و الموال و القصیدة الشعبیة و الحسینیة. له محاورات شعرية مع الشعراء منهم الشاعر رحیم جمهور الحیدري. و له دیوان باسم طبعي الوفه مخطوط و ایضا دیوان باسم محاورة بین الشاعر و الشاعر مخطوطان و لم يطبعهما الى الان. نشکر الشاعر هاني بور رضا المذحجي کثير الشکر على ارساله نبذة عن المترجم له.

 

 

من شعره:

دارمیات الشاعر:

حن گلبی حن النوگ حن للحبیبه**** حاکم ابو سلطان یاهو الیجیبه

ابباب الولف دگیت مافکلی الباب****ما ادری هیچ ایصیر تالیته چذاب

هم شفتوا یاهالناس مثلی ابتله احد ****شیبت وآنه ازغیرالله لحد

یاویلی یا ویلاه من کثر الهموم ****عینی رگت یاناس ماشافت النوم

متعجبه کل الناس بالعاجر اتجیب ****وآنه اصبحت ماشوف یبرالی الذیب   

طگنی الوکت بسمار وانبت بالضلوع****عیب ضلع یاحیف والثانی مشلوع

مدری اعتب اعله الشال مدری علیکم ****طیب حنین وزین مایصح بیکم

متهمنی لوکل ساع اجروحی اتصیح****لاچن هظیمه وحیف لودمعتی اتطیح

لانی الهلی ظلیت لانی الحبیبی ****عالجنی عشر اسنین وائس طبیبی

گلبی انصدع من شال محبوبی ابعید****ابلا ولف ظلیت والوحدی اوحید

یگضی العمر ونات ونه اعله ونه ****اتزوج ابیا یوم واعجن الحنه

عمده ارد امر عالدار والطم عله الراس**** کله امن ابوهه الصار والله والعباس      

یابعد های اوهای یابعد الفراگ****الدهر یم شمات اویابانی اطراگ

خل گلبی خل مرتاح مایحمل الهم ****گد مابچیت اعلیک طگ اونزف دم

 ماظل دمع بالعین وابچیلک ادموع****اشلون اوصلک یفلان والدرب ممنوع

فیزه اطلبوا لعراگ ماعندی فیزه ****ازهگ وطر الهور من الحویزه

اگلیبی من الاه طگ اونزف دم  ****والحسن چبده انزاع گد ماشرب سم

کفنی یعمی او روح بس کافی ارجوک ****انعل ابو الجانیک لا ابوالیابوک

کض الگلب سکتات موفرد سکته ****اشعجب ما مریت چاوینک انته

کظ الگلب سکتات وانته ادره بالحال ****طایح طریح اوساد والدمع سیال

الدمع دم ایفور عالوجنه سیال****اتعنیت الک یفلان گالوا امس شال

اتکفه بالموعود لمن میظهر ****وهم یگضی طول الیل والفجر ینطر

سم بیدی اسم الروح وانطیهه للموت****ماکوا بعد بالناس صاحب ومثبوت

شلی بعد بالروح شلی ابحیاتی ****حتی اعز الناس یدعی المماتی

هین علی الموت احله امن الفراگ****خل اندفن بالگاع یضربنی الف طاگ

غیضک لون اسنین طول بعاده ****لاودی ناس اشراف لاودی ساده

ابوذیات للشاعر:

علی دهری المصائب حیل شدهن****واشوف اویه العگل والگلب شدهن

حرت شسعی شعالج بعد شدهن****المرض اثر اوما ظل حیل بیه

************

یجرحن گلبی المصایب یاهونه****وبعد ما اعرف آنه یاهونه

راحوا کل اهلنه یاهونه****بگت دیرانهم وحشه اوخلیه

**********

الشامت بالگلب بالنار ویاک****وطحت یاهو الیحن اعلیک ویاک

الچنت منهم اوچانوا دوم ویاک****اشومن طحت مامنهم بجیه

**********

اذوبن من ونین الروح سکته****اوطاحت حیف هاذ الگلب سکته

تقبلونی اموتن صدگ سکته**** اوتهیلون التراب انتم علیه

**********

بعد المن اجی لیکم وداکم****وغیر الطمع ماشفته وداکم

عملتوا بالگلب طوبه وداکم****تسلونی اوتراوونی المنیه

**********

ابگلبک اسمی یامحبوب ورده****واجاک الگلب ظامی اعلیک ورده

وین الگه مثلک بعد ورده ****تشع اریاح من تگبل علیه

***********

حچی اویاک موهین و واقع ****وطحت ابیر هجرانک و واقع

ابسند حبک ابصملک و وقع ****واذا تقبل اصیرلک ضحیه

**********

غمیج اصواب دلالی وترکه ****وروحی اصبحت مهجوره وترکه

عوف الولف گالولی وترکه**** اترکه اشلون واهوه الروح بیه

**********

احبک من سنین الصغر مهدای****وعلیک الگلب کل الگلب مهدای

جمیل انته واعله اسمک حلو مهدای****واذا تجبل ترد الروح بیه

**********

یهل حسنک ابکل الناس فاتن ****ارماحک یاترف بالگلب فاتن

اعیونک من شفتهن علی فاتن****خذن عگلی اوبگیت ابلا وعیه

**********

عمام الماتفیدک حیل ولهم****یجیبون الکدر والگلب والهم

الک الله یبعد اچلای والهم****السگم لا للحیه اولا للمنیه

**********

وحگ الی فده یسره ویمینه****قسم ماخالف ابربه یمینه

ملک صارالچ هاذ الگلب یمینه****الحکم بیدچ والعبی دور بیه

**********

طحت آنه ابغرامچ حیل لیله****واحب اگضی وطر ویاچ لیله

مثلی ماعشگ مجنون لیله****ولا یوصل محبتنه سویه

**********

لزم ایدی الدهر اوحیل شلهه****وچثیره اجروح گلبی اشلون شلهه

روحی من حیاتی بعد شلهه****اموت امن المرض بالمیه میه

*********

ابکثرما طب صدیقی الروح ملهه****وحیاتی اویاه حیل اصبحت ملهه

لهیت الروح حیف اویاه ملهه****اخذ منی الیریده اوخان بیه

**********

محمد صعد للباری وصله****اهناک اتوضه اوکبر وصله

علی ماهو شخص عادی وصی الله****واجیبه بالصلا واجب علیه

**********

یظل جدمی عله الطیبات یسری****وحبک بالگلب یاترف یسری

اذا یمنای اهلی انته یسرای****وازامط بیک یوم الموزمیه

*********

ملمع:

وحگ امی وابوی وبعد جدی****حرفم باشما ای دوست جدی

ذنبی اویاک شنهی وصرت جدی****چه شدکه صاراهوای ماتعطف علیه

**********

دارمیات بینه و بین الشاعر رحیم جمهور الحیدري

عیدان

تطلع شمس واتغیب کل یوم اعدن****وایامی الحلوات ماظن یردن

رحیم

لاتظن بعد ایعود یوم التعده****بعد اشیلمه المای من ایتبده

عیدان

اتبع سراب الگیظ حسبالی اجد مای****ذبلت الروح اعلیک واتن اچلای

رحیم

غشک سراب الگیظ حسبالک ابحور****اشما تمشی هوه ابعید لوتمشی اشهور

عیدان

اسکت اظل مهموم لو احچی گالوا****سبک بعد یفلان اخوتنه شالوا

رحیم

ما شالوا الخلان الزین ابمکانه****لا تسکت ایگولون عندک خیانه

عیدان

لا تهم ابدنیاک ما تسوه هیه****وین الگبل ویاک تمشی سویه 

رحیم

صح ابکلامک هاذ ماتسوه دنیای**** اشما ارکضلهه اقدام ماتصحه ویای

عیدان

ماعانی من الضیم واصبر عذابه****عطشان ادور مای واتبع سرابه

رحیم

عدنه الصبر مفتاح ابکل قضیه****لا ابسراب الگیظ توجد امیه

رحیم

لا تهم ابدنیاک اشگد راید اتعیش****اهتم انته بالخیرات لململک اعشیش 

عیدان

مرتی وابنی اویای مجبور اهمن****ومن عمری هل ایام احسب وعدن

عیدان

العشگ ماهو عیب عیب الیخونه****ریته ابعذاب اوضیم الما یصونه

رحیم

الخان العشگ یاخوی ماعنده ذمه****للعشگ یفدی الروح تسبح ابدمه

عیدان

باب الفرح مگفول مفتاحه ضایع****والدهر بس ویای کل وکته جایع

رحیم

خافنه المفتاح طاح ابزویه****دور علی تلگاه بالمیه میه

عیدان

ایامی الحلوات ابنومی طوفی****مطلوب وام اهوای ما اگدر اوفی

رحیم

شلک بعد بل وام المن خذیته****هسه تهم بالدین من خلصیته

عیدان

شکتب شسولف اهمومی اجبال****والجبل عالمتنین لاتظن ینشال

رحیم

شیله اعله متنک کون لاتشکی لحد****والهم یخی لوطال لابد اله احد

عیدان

یل وین اشوفک وین وحچیلک الضیم****انتظر ربی الیوم مثل الزرع دیم

رحیم

لومثل زرع الدیم واتنطر الله****هالبت یفکلک باب انتظر بالله

عیدان

الفگر لز ویای کل وکتی دایم****لا شغل بس بطال للظهر نایم

رحیم

لاتظل نایم گوم الله الیعینک****دور شغل بالنوم لاتلهی عینک

عیدان

لوچنت زین اوزین وافعالی تشهد****لو هسه البیبان ابوجهی تنسد

رحیم

ماهی سوه الایام ملتبگه زینه****کل واحد البیبان تنسد ابعینه

عیدان

خل اکتب اشمارید ظیمی ولانی****من طحت حد الیوم محد اجانی

رحیم

اشماتکتب امن الضیم مطلوب اله دین****متوفی یاعیدان حت لو ورقتین

عیدان

صدت علی بالعین ابنیه سمره****منهیه گالت حیف تحچی ابعبره

رحیم

متکفنه هالعادات های الکثیفه****وماکوا نهاوی اتصیر کلمن یلعب ابکیفه

عیدان

بحشانه رمح البین اوبالگلب سچین****چنه العمر خلصان احسبنه میتین

رحیم

یگضی العمر عیدان ونه اعله ونه****اومنهل دنیه انروح ماچنه چنه

عیدان

سمچه وشحیح المای والواشی صیاد****سم ذبلی البد ذات حسبالی ذب زاد 

رحیم

ماتدری البد ذات ایدور الغبر دوم****فدوه الک السماک ریت اهوه مسموم

عیدان

یابعد های اوهای والهم بیادر****حبک سکن بالروح یبن الحیادر

رحیم

هم گلبی حب الزین والعنده وجدان****وساکت ترا بالروح حبک یعیدان

عیدان

لاخبر لامرسال لاهاتف ایرن****ماکوا صدیج الیوم للصاحب ایحن

رحیم

ماکوا مسافه ابعیدورن الهواتف****دوم آنه اشوفک دوم بالسچه واگف

عیدان

طگنی اوسطرنی البین و ودراعیونی****والدکتر الشمات کلش عمونی

رحیم

لودکترک شمات لاترجه طیبه****ینطبج وی الضیم های المصیبه

عیدان

عفت البچه اعله الحال والیسلی الگلوب**** اولعیونی الضحاک خلانی مطلوب

رحیم

الیبچی اعله حالک لیش عفته اوترکته****اتعاشر الضحاک هسه عرفته

عیدان

سمره اوجمیلة لون حلوه اورفیعه****گلبی خذته اوراح الهه ودیعه

رحیم

تستاهل الهه ایروح گلبک ودیعه****امهنه من حبیت حلوه او رفیعه

عیدان

کلک محنه اوطیب بیک افتخر دوم****یوم الاشوفک بیه تنزاح الهموم

رحیم

مرکب واشیل اهموم اشماعندک اهموم ****یل بالمحبه اوطیب شاعتلک اعلوم

عیدان

من السمه للگاع ذبتنی دنیای****یمی واخوی وگال لاتگری احذای

رحیم

الماینفعک بالضیج شلک بعد بیه**** یل ذبتک دنیاک هم لابد اتیه

عیدان

گتلک رحیم ارجوک الحگ عله الصار****صابانی سهم البین وابگلبی حط نار

رحیم

لاتشتکی امن الضیم واصبر یعیدان****اخلاف الصبرچابیش تنطفی النیران

عیدان

گلی الصبر چندوب هوه الصبر نار****ماتدری بیه اشلون والدهر غدار

رحیم

دوم الدهر غدار لاتامن اوصیک****الغدر بیهه اهوای موبس غدر بیک

عیدان

حطنی ابحلگ شمات وسفه الاحبه****ودورت کل الکون ما اله طبه

رحیم

اخذ الحذر اوصیک من التحبه****وجهه بشر ویاک اشتعلم ابگلبه

عیدان

بلوه ابتلت هالروح چندوب اداوی****اشما داوی بلوه النوب تطلع بلاوی

رحیم

ابهاذه الوکت یاخوی اخذ البلاوی****هوه الدوه شیفید خاطر تداوی

عیدان

طحت ابحر عشاگ والعشگ گصاب****خلف جرح بالروح لیهسه ماطاب

رحیم

جرح العشگ یاخوی مایشفه للموت****ادعی الله ایشافیک والبلعته الحوت

عیدان

یالمهدی یالموعود شوطال الفراگ****الکتل بفلسطین واتعده العراگ

رحیم

یالمهدی یالموعود الحگ علینه****چی نحب گلنه احسین احنه انولینه

عیدان

ابچی ابتوالی الیل واتسله بالون****من شالوا الخلان للیوم انوحن

رحیم

الشالوا اله خلان سلوته الونه****ایظل یون واینوح ما ضحک سنه

عیدان

ساهرت طول الیل والدمعه عالخد **** ردت امشی ازور احسین والدرب انسد

رحیم

هم ینفتح واتزور سید البریه****ونشکی ابحضرته الضیم ابدمعه جریه

عیدان

گالوا صبر ایوب مامن مثیله****وابصبری مایدرون رک منی حیله

رحیم

ابصبره تدری ایوب حصل نتیجه****من هالوکت لتضیج واجرع ضجیجه

عیدان

ابچی ابتوالی الیل والونه بهدای****عاگه ابحر ظلیت والکوسه بالمای

رحیم

خل تبچی های العین عالفارگوها****لامن علیهه ایون لامن خذوها

عیدان

سمچه ابحر ظلیت والبلوه بلوای****ناصبلی الصایود والکوسه بالمای

رحیم

سمچه ابحر واترید تشکیلی بلواک****آنه ابشحیح المای وامجاور اعداک

عیدان

شوف الوکت ویای شوفوا عذابه****مثل الکبر ظلیت یحچی ابشبابه

رحیم

الوکت نوبه اعلیک نوبه الک یندار****وتاخذ علم واخبار تدری امن الاکبار

عیدان

مطرت دموع العین عالشالوا ابعید****لا خبر لامرسال لامروا ابعید

رحیم

مامن دوه ایداویه یاجرح الفراگ****الفارگ المحبوب کل وکته مشتاگ

                     *********

محاوره بینه و بین الشاعر رحیم جمهور الحیدري للابوذیة

عیدان 

علیل الجسم بس الروح حیه****اوصدیج الی احبه انگلب حیه

اتعنه العدوی اوبیه حیه****لئن یدری ابعدوی ایعیل بیه

رحیم

علیل الجسم بس الروح عدله****واسمح للصدیج اودوم عدله

بیدک لویمیل الحمل عدله****اوللزینین صیر الهم تچیه

عیدان

هاک الروح خویه وانته سلهه****مسلوله اوصعد لچلای سلهه

علیه اسیوف هذه الدهر سلهه****ولا مره رحمنی اوحن علیه

رحیم

شسئلهه شگلهه شوصفلهه****عذاب اوضیم روحک شوصفلهه

العیله الچان دهرک شوصفلهه****خان اومال بالبیهم حمیه

عیدان

انه الغصیت وشرگ گمت بالمای****وصحت ماظن اعیش ابغیر بالمای

بعماق البحر مامشه بالمای****وبلم هالناس یمشی اعله الوطیه

رحیم

حگک من تغص وشرگت بالمای****وماجد لیش بلمک یخی بالمای

الورد من طبعه یزهی یظل بالمای****وانه بالمای وردی اوذبل فیه

عیدان

روحی امن القهر یاصاح بهدای****وبسکوت آنه اجر النفس بهدای

یصاحب داوی جرح الگلب بهدای****ترا مجروح وادری ایعم علیه

رحیم

اعله روحک دوم من القهر بهدای****ولا تفحط عله دنیاک بهدای

الیرکض هم یمل وایگوم بهدای****یمشی ابرهدنه لو گطع فیه

عیدان

حزنان الگمر والنجم بسمای****حلیب الی شربته طلع بسمای 

چانت تحچی های الناس بسمای****دگلی اشغیر الوادم علیه

رحيم

گطعت الزاد صار اغذای بسمای****خفه صوتی ولاینصاح بسمای

الدر لوشریته اوطلع بسمای**** لبن سوه اولاتحچی القضیه

عیدان

یمن فدوه السمر للبیض یرحین****ومنهن صار وسط الگلب یرحین

خفت لعیونی من الشوف یرحین****درت وجهی اوبگیت انظر فیه

رحیم

البیظ الخلفن بالگلب یرحین****للغمان وسفه اوحیف یرحین

اذا تعرف اعیونک یخی یرحین****صد لاباس وانظرهن خفیه

ایضا حکیم ساکي شاعر اهل الحویزة ارسل هذه البیت:

هنیاله الذی سماک عیدان****الوجوده یالیالی الفرح عیدان

الوفه ابطبعک یشع اهلال عیدان****الضحایه والفطر هلن سویه  

فاجابه:

الوکت قاسی اوعله الزینین یحکم****الحگ بسمک لون ینکتب یحکم

انه ممنون منک حیل یحکیم****تزامط بیک احویزه الابیه

عیدان

اجه مکتوب من اهلی علامه****بچیت اوصارت ابخدی علامه

مالوم البچه اوینحب عله امه****شفت روحی یخویه اشصاربیه

رحیم

تلوم الیبچی وینحب عله امه****ومن دمعه اله ابخده علامه

ولامکتوب من اهلی علامه****یخبره وین صاروا یانویه

عیدان

احبابی اگرب امن الروح ودنه****یصبحون ابهنه وابخیر ودنه

حملنه یریح اویاک ودنه****الجمع خلانه اونگعد سویه

رحیم

مثل الروح باری الزین واکثر****ودعی اشماتوده النفس واکثر

اذا عند التوده الخیر واکثر**** تنوله عند ابوذات الوفیه

عیدان

من النوح مل اوشال جاری****ودمعی مایبطل دوم جاری

نحل جسمی اوشاب الراس جاری****وشفت ضیم المرار المر علیه

رحیم

جارک شال من النوح والون****ودمعک لاتبطله اعلیه والون

اهروش آنه ابدلیلی اذبلن والون****عله الشال اوبعد ما مرعلیه

عیدان

الشارب مانفع للرجل لوطال****واصلک لا توده بعد لوطال

مرجوعه الاصوله الگصب لوطال****وانه شمر هلی غیره اوحمیه

رحیم

الرجل من غیر شارب فاهی ویهه****والیبقه ابامل فر گلب ویهه

اذابیتک گصب آجور ویهه****الناس الناس الهه الظاهریه

عیدان

انه المشغول مالی بعد فرژه****یربی ادخیل انطی الگلب فرژه

احب آنه رحیم او اخوفرژه****اریدنه یمر هالبت علیه

رحیم

عسر عیدان ربی ابیسر فرژه****تدری ابضیج اهو والناس فرژه

اشتطلب وشترید امن اخو فرژه****فدوه اتروح الک روحی ضحیه

عیدان

الدهر ویه الیعیش اوحید خوان****وعگله کل وکت متعوب خوان

عمت عینه الیعیش ابغیر خوان****یهینونه ولا یحچی خطیه

رحیم

الدهر خوان ویه العاش وحده****وعگله البشر یتعب لون وحده

الرجل لوحچه کلمه کون وحده****عیب اثنین لوصارت علیه

عیدان

یربی اشحلو شعره اوحلو متنه****دشداشه لبس واشحلو متنه

یربی ادخیل من هالبشر متنه****خزرنی ابنظرته اوشفت المنیه

رحیم

لاتنظر المتنه اوشوف طبعه****وخصایل هالبشر کلمن او طبعه

بیهه بس تنظره اتعرف طبعه****وبیهه اطباعهم کلش ردیه

عیدان

ابعینی امن البچی مابعد ظل ما****من کثر ضیم الحبیب وجورظلمه

علی دنیای کلهه اصبحت ظلمه****عمیت اورحن اعیونی امن ادیه

رحیم

شفت ضیم الحبیب اوشفت ظلمه****ومن عنده نهارک صار ظلمه

مایدری اخلافک بعد ظل ما****واحد یذکره او حن علیه

عیدان

ابسد اهل البخت الروح لاذت****وماشفنه ابعمرنه ابد لاذت

لاغیره بعد بالناس لاذات ****ولابیهم تصح حته الحمیه

رحیم

لاکو ذات لاغیره بهالناس****وجلیله اهل البخت توجد بهالناس

طبع صار الطمع والغش بهالناس****ماکوا رحم بس بیهم اذیه

عیدان

اویاکم حچی یاطیبین ینجاب****ومو کلمن تکلم کون ینجاب

بس الزین بالگعدات ینجاب****ویظل منسی الغبر حد المنیه

رحیم

من تحچی وعلیک اترید ینجاب****ویه البالکلایف دوم ینجاب

الطیب من اصل طیبین ینجاب****والغبر خلف غبرما یسد فیه

عیدان

الحیادر من خشب صندل وجنه****وحبهم صار الی هیبه وجنه

لون تنجمع کل آدم وجنه****ابد ماتوفی ابحگهم علیه

رحیم

صحیح احنه خشب صندل وجنه****وانحیی بالگصد لینه وجنه

اذا آدم فزع لینه وجنه****ما ننزاح وانحامی الثنیه

عیدان

محبوب الرجل لو ثگل وزنه****یبتعد عن الحرام ایکون وزنه

الف واشی علیکم ترا وزنه****عرفته الزین والذاته الوفیه

رحیم

میزان الرجل ابثگل وزنه****یصد عن الحرام وچذب وزنه

الوزکم هم علیکم هاذ وزنه****اترکه اوکل وکت انعل ابیه

عیدان

گلبی امن القهر مهموم بیدای****ومن الدای فر اوسکن بیدای

ولا صاحب الحط ایدیه بیدای****نسونی اوما بعد سئلوا علیه

رحیم

اهل هالوکت بالک تمن بیهم****اسحاله عیب یطلع تمن بیهم

ثلاثه امن الخصایل تمن بیهم****الچذب والبوگ والشوفه ردیه 

کل الحقوق محفوظة لموقع ادبنا

TPL_KH_LANG_MOBILE_TOP TPL_KH_LANG_MOBILE_SWITCH_DESKTOP

مجوز استفاده از قالب خبری ناب نیوز برای این دامنه داده نشده , براي اطلاعات بيشتر درباره مجوز استفاده از این قالب به سايت خليلان رسانه مراجعه کنيد .