موسوعة الادب العربي في خوزستان

TPL_KH_LANG_KH_MOBILE_DESKTOP TPL_KH_LANG_KH_MOBILE_REGISTER TPL_KH_LANG_KH_MOBILE_LOGIN

الشاعر اسماعیل عیدان المشعلي

اسماعيل عيدان المشعليالشاعر اسماعیل عیدان المشعلي: شاعر من شعراء خوزستان ولد في قریة الفنيخي من توابع مدینة بستان و ترعرع بها و تعلم من بیئتها ما یجعله شاعرا بارعا محبا لاهل البیت علیهم السلام ینسب الی عائلة عریقة ادبية تضم الکثیر من الشعراء و الادباء و الخطباء، ثم هاجر الى مدينة الاهواز و سکنها، له ثلاثة دواوین (نهج الهدایه) و (گلب ملهوف فی ملحمة الطفوف) و (ابن عیدان) فهو شاعر مبدع له خبرة و تجربة عالية فی الابداع ، یعرف بین زملائه بأنه صیاد القوافی، و سفیر القصیدة الغزلية. من مميزاته سرعة الجواب في الابوذية المشعلي شاعر یخدم الشعر و الادب بشعوره، و أدبه، و أخلاقه، و ثقافته . من قصائده الجميلة في اهل البيت عليهم السلام قصيدة باسم "لبنک يا حسين" لقرائتها انقر على التفاصيل.

 

 

 

آنه اویاک
آنه اویاگ اخوه او سوه انرید انعیش فک باب التسامح بالک اتغلگه
لا معصوم انته او لانه هم معصوم غلطه اتصیر لیش ابیتنه انحرگه
خلینه اهل دوم ابسلم مو گوم خسران او علی الما وسع الخلگه
یادیوان خالی من الطلایب گو ل گلی السابگک چا یا مته اتلحگه
اهنا مکتول طایح غادی غارج ظیم اهناک الذیب ظلمک فاکله حلگه
او ذاک المنهب ذاک التبهذل راح حاله اشلون حاله ابن آدم اتزهگه
او عصاتک الروحک تطگ روحک لیش شتحصل ابأیدک راسک اتفلگه
والمن هالشغب والتعب والاجرام و عله خالی بلاش اتشیلک تفگه
وشگد یتمت وشگد هجمت ابیوت نوبات ابن ابوک اتروحله اتسحگه
والیکتل نفس منصوص بالقرآن ربک گالهه چن کتل کل خلگه
واحد یندحچ محد بعد مأمون الماعنده ذنب چابیمن اتحگه
لا شیخ اوعشیره او لا اخو او لا جار یسلم نارهه او یاویله التخلگه
ابیا قانون های ابیا عرف یادین حط شوفک ابغیرک بالله هم تلگه
لیش الجهل یلعب والعگل مچتوف واحنه ابعصر بیه الوادم امشهگه
الیوم ابلا علم وابلا ثقافه اتذیع خل گلبک هذنی اهوایته او عشگه
او شد عزمک الناسک صلح المافات خل طیر السعاده ایسفگ ابسبگه
وازرع ارض فکرک خلهه تثمر لیک رطب نخل الاخوه اویزهی ابعثگه
تبگه اانته الوره مو حیف وانته الکون کون اترید بیک ابراسک اتعلگه
ماظلت ثقه
غمک من وکت خوتنه بیک اشلون وجوه اموالفه واگلوب مختلفه
اوماظلت ثقه ابواحدبعدهالیوم چلمه اتغیضله اوینطی الگفه السلفه
ینسه العشره کلها اوینسه اهل واخوان کلها ایعوفها اومایلتفت خلفه
اوینسه المابعیدایشوف یخسرحیل مایهتم بامرها اشرایح ایکلفه
موحته الهلک صارت ان ردت الخیر بناهاابگصد گایم جنحک اتنتفه
اوقاعدت الرجل لیریدعزاوشان کون۰ ایتم جبل ماعاصفه اترجفه
السماحه اتکون شانه الحلم وسع البال وایگابل الخشنه ابچلمت الترفه
دینک هیچ صرح گدها کون اتصیر والنشمی ابد ماتزلزله الکلفه
چم دوب آنه اجبر وانتم اتکسرون او مابیکم بعد لیعدی الزلفه
وانتم ذیچ اهلکم للها شایع صیت اهل غیره او مروئه او قمم بالعرفه
واحنه اعله الچلیمه امکامش امن الروس یا حیف او حسافه او میت الف وسفه
فشله او عار والله او فشله حیل او عار حد گطع النفس لوگول متکفه
وانتوا اخوان عوده او فد ظهر فد بیت ها یهل النصب شو نوگکم عجفه
او صرتوا مزهده او مظحکه ابین الناس او خلیتوا جرح ما ینگطع نزفه
شوفوا غیرکم واتعلموا اشناوین نوایا السود ابد ما راح تتخفه
الزین الیلم شمله الیحب الها الخیر مو ذاک الیطشر راجح الکفه
او بسکم آنه وانته وانته ابن فلتان ما ینجح تره امن اخوته الیتحفه
او وصلت للعظم ویاکم السچین واشوفن نوگکم مایله او عا لچفه
او تراهی های اشاره او شوفو عاد الجای لو بیکم ابوی النوب ما اهدفه
اشگد بینه
ابمستنقع جهل لیمته انظل انعیش ما ننهض بدینه انصلح انفسنه
او صرنه احنه ابقرن الواحد او عشرین لا چنه خلصنه ابنومنه اوخسنه
الوادم وین وصلت قمه التمکین واحنه ابضیمنه او ماینسمع حسنه
او واحدنه یخلف بالعدد اضعاف اونذب بالشوارع وابد مابسنه
اشگد بینه الذی لادرس لاتثقیف نرجامن یجی ویگوم یحرسنه
اویا بیت التطبله اتشوف بیه اثنین بالیها الادمان والم متعسنه
وامیارر لحه اویاریت عالحگ کون چان الظیم ابد یاخلگ مامسنه
نکتل عل زغیره اونهیم الهه ابیوت مایفرق غنینه اوچان مفلسنه
البلغابات تسکن ما اظن هم هیچ اکلف من الضاری ایتم مشاکسنه
اوعله عرکت جهال السلف کله ایگوم حیهم فوگهم لشعب هوسنه
اوبالله اعلی الحشیشه التفگ یغدی ایثور اوماغیر الطلایب بیه مجلسنه
وارکض جیب عطوه اوهاک ذب افلوس والچف النذل لاباس لوبسنه
الحگ یصبح بطل والبطل حگ ایصیر اوچم اوچم ضعیف الرحنه لیه دسنه
الجانی نشتریه بفلوس غم الرأی اوتلتم علی الراس اکتل یفارسنه
یمته الناس تسلم گلی من شر هذا اذا اهوه الزین عدنه اوبیه تنومسنه
او دگصد للمحاکم تلگه غیرک ناس نبگه الیا وکت عرکه ابهواجسنه
او محرومین نزعم گوم اقره التصیر لیش السان امک حته ماتحسنه
هم شایف الامی ایجیب لهله احگوگ لاهذا الوضع کون الیدرسنه
بالهوسات ترجه اوبالرمی اعله المیت لولا بالغناوی ابفرح معرسنه
الوادم بالثقافه او بالعلم یرگون او ماواحد البیه لازم ینافسنه
اشوی ارجع وره اوشوف المن المیدان اذا ماهو الهلک حگک اتأیسنه
اهمه اهل العلم والحلم والتدبیر چاو احنه الفرع مانرجع الرسنه
او چانوا اهل غیره او اهل همه او زود او بیهم یالتمجد لا تقایسنه
چانت دنیه ظلمه او مثل هسه الحاد والمنجی الاجاهم من مدارسنه
واهوه الطوعاها الخلگ کل امچان القاضی اودونها اوعالکل ترسینه
چاهسه اشلفانه اولیش هیچ الحال وین احسینه او چاوین عابسنه
واذا مانلحگ احنه او علی انفوسنه انروح بنیاب الوکت دنهض یدارسنه
او بسکم بعد یمصاحبین ابلیس موعار او مذله الوکت لبسنه
السلف
بچه اعلیک الشعر من سمع بیک اتشیل وارباب الشعر نصبت ماتمها
لئن انته الچنت کل وکت تهتم بیه واشعارک ابحگ احسین تنضمها
حسافه اوحیف وانته اتضمک التربان وارکان الشعر رایح یهدمها
من علمک لفه شالت اعلام السود اوزانه اوبچت واجفاک عادمها
چلمتک لن لذیذه اوعذب شعرک چان واشعارک رسم رسام ترسمها
اوخدمته ابخدمتک لحسین واهل البیت عباس اوعلی الاکبر اوجاسمها
اشلون اوما الک یحزن عمر مو عام لابل دم دمعته اعلیک یسجمها
مولنها رحلتک ماهی هینه اعلیه اولا لاهل الشعر لن من معالمها
اجاک اوشایل اهمومه اعلی راسه اکوار لن فگدک مهجته ابنار ضارمها
اوذوله اهلک عمامک هالتنوح اعلیک ماتگعد یطیب چا تنادمها
علم الهم چنت من چنت تفخر بیک وابکل الکلایف چنت جادمها
او معتازیک تبگه السلف لهله ایرید ایرید البلشدد تشهر صوارمها
الوکت کلش غبر والخوه شحت حیل اوقلیل الظل بعد ینهض ابلازمها
ندور عالزغیره اشلون بالله اغتاض اشلون اگدر اشتت شمل وادمها
اشلون اتحایل امحایل اویالخوان وادور عالغلب واشلون اصادمها
اومدری امنین اجت والجابها النه امین هیاکلها السلیمه ابغدر خذمها
الابن ضدالابو وایرید موته الیوم گبل باچر واهو ناسی ا محتمها
والعشیره اثنعش صارت والبیارغ کون ابکثر زلم السلف والله الیسلمها
اوبالله اشیوخها بالعدد ماتنقاس ضاعت بین ابوها اوبین خادمها
واهلنه ابعز بنت من گبل الها اصروح خرابه البگت منهم لا انهدمها
اوخلونه انتکاتف خل نظل اخوان اوخل های العقول انهب نرزمها
اوخل البیه علیها اوکفوا الهذا الدای مو کلمن ایگوم الها اوتوزمها
اترید الها حلم حکمه اوعلم وافنون اورجال الما تچل ابدا عزایمها
چاکلمن ابجیبه ایصیر صم افلوس بناهم بیه علیها اوبیه یحسمها
یعمی ثوبها بس الاهلها ایلوگ اوخللک خل اهلها اهیه اتزعمها
رحمه الباری
چان الوکت موحش والحکم غابات اوبس بیها الضعیف الینقصب حگه
اوچان العدل ضایع والظلم سلطان والیطلب ابحگه اذیابها اتسحگه
ابدا لا رحم لامن ضمیر الحی لااذرت حنان ابناسهم تلگه
عبادت اصنام اشترجه منها اتنول غیر الطمع بیمن بعد متعلگه
بیها ابلا تعب مبذول عدها العیش واخره اتکد عبث واجلودهم زرگه
تتنفس قهر تجرع محن واهموم یاذله الذله ابن ادم اتزهگه
مثل نخل العرگ ابلا ذنب مذبوح ناسه اتکد علیه والغیرهم عثگه
اومثل نفط الاسلام اتشوفه بس بالعین مابیه خیر لهله اوغیره المغرگه
چانت هیچ الاکثر ناس تسحگ ناس والرحمه الباری اعیونها امحلگه
تترجه الفرج تترجه بدر الکون بلچی ایطل علیها اوتنهض اتشبگه
بلچی ایهب نسیمه ایلوح بالافاق وایداوی اجروح الچانت امغمگه
ا و کلش ضایگه اوتمطر عذاب اوظیم چنها ایامنه البالظلم مختنگه
اولن طاها انبعث یامرحب اوحیاه اوصارت بالعکس وانگلبت الورگه
کلها اتحررت ساد العدل عالگاع فاضت رحمه الله اوسبحت خلگه
مایفرق عدوه التبعته امن الناس شملتها الجمع والحاقد ایطلگه
زاح الجهل عنهاالظلم والدیجور سدباب الضلاله البطل سد حلگه
اوتم عون الضعیف اوسند سید الکون واهوه اهوایته اوثروته اوکل عشگه
اوبیه شید اسلامه اوحط علی الناطور عنوان العداله الهیکله اودرگه
اوگلها ابحکم ربکم ماکو عالی اوناص الفارق بینکم بس تقوته التبگه
بنه اسلامه ابحکمته ابحلمه المختار وابخلقه السامی اوصعد بیه وارگه
تعب بیه وجتهد جاهد الحد الموت حیا من نهج مافوگه ابد تلگه
یعنی اهوه حریه اهوه شموخ اوزود والحط بیه جدم ماواحد ایسبگه
اوهذا اهوه نهجنه اولچن بس بالگول بس لا بالفعل لا ابد منسحگه
چاهسه اشعظمنه انچان نمشی اعلیه لا بینه الذلیل الینقصب حگه
لاصهیون تلعب لا امریکه اتجول لازرع التلاحم واحد ایسحگه
لاانته اوانه والخلگ کلهم اید اووحده اسلامنه وشحده الیفرگه
امجاد الامم
یااول سبط للمصطفه المختار من فاطمه اوحیدر واول احفاده
میلادک اللیله اوبیه کثره اگلوب مغموره ابشکل سیدی اباسعاده
اویافرحه الزهره اشگد چبیره البیک والکرار یومک اکبر اعیاده
اوتتوافد ملائکه السمه اعالبیت من الجلاله اتهنی اسیاده
مولنک هدیته الام ابوه ا انطاک وایتم ابجنانه الحبک اخلاده
واهلک بیک فرحواواهم اصل الکون نوره اوروعته اوعلته الایجاده
اشلون الکون کله اوکل وجود البیه مالجلک یظل یسحر ابانشاده
لابل الارض ترگص تظل بالناس وابنای الفرح تعزفلک امجاده
اوکاسات الهنه ابکل حفل تغدی اتدور وینسم شربها ابروس وفاده
تنزل سلسبیل اتطفی نار الظیم اونار احزانها الکل وکت وگاده
اویا محله القصاید بیکم التنگال لیلو امسطره والغیدها اگلاده
اوتستاهل یاسد موبس مدح واشعار لا بارواحها بل الک تتفاده
یهیبتها اویعزها اوشانها اویاتاج امجاد الامم یالالک لقیاده
اویاازکی الخلگ یالبیکم الینگال انته وابن ابوک الناسها الساده
عیدک سیدی اوبیه الطرب موهوب واشعار الغزل وامغازل الغاده
اوگلت خلنی الحزن خلینی اکتره ابصوب اوهذا الوکت عنی الیصلح ابعاده
لچن من دون اراده الشعر ردنی اردود لیه اوظل یجی اعللورق چالعاده
اوذکرنی ابعناها اوظیم های الناس وابجمر الماسی الیکلف اخماده
ناسک سیدی ابکل الامصار ابظیم اوچم اوچم علیل البعده باگایده
نفس ذاک الظلم والجور یردم جور اولا تحصل حمایه اولا من اسناده
چاتلها الضم مرحب اتسمعه ایصیح وین ابطالکم بحانی المناده
یسردال الحرب یااسوه الاحرار منهو الیکع عنهم گلی اطراده
اذا بس بالتفاخر بالنساب اتجول وابحب الکراسی لاهیه القاده
خلها ابیوت تخرب تنچتل اطفال خل تبگه السلف بالسجن اجواده
خل یلعب یظل خلها البطاله اتسود وادمان الشباب اوتگضی الراده
اوخل نار الفتن تحرگ ابیوت الناس خل السایده اعله السوگ فساده
خل ثرواتها للکفر خلها اتروح والمسلم یظل اجنبی اوببلاده
خل ایزیدها ایحل ابکان احسین اوخل صرح المذله ایثبت اعماده
خل زینب یسیره اتروح لبن ازیاد خل زین العبا د ایبات باگیاده
خل الحگ یظل مذبوح مثل احسین جثه ابلا دفن وابذاری امهاده
بس لاهل البطل کون الکراسی اتدوم اوسالم هالشعب کل وکت جلاده
امتانینک تجی
امتانینک تجی دله اعلی موگد نار هیچ اگلوبنه اوبارواح تلفانه
اوچاتلنه الهضم والاه تتبع اه ملینه الصبر والصبر ملانه
ترضه ایعیرونه اووینه التندبوه اوتتشمت تظل یاسیدی اعدانه
وانگلهم یجی اوما تجی اوننطر لیک واعیون الامل بادمع غرگانه
وینک سیدی مو ضاگ خلگ الدین من فعل الخلگ وانهارت ارکانه
اوجدک ذاخرک للوکت من ایضیج من تکفر الدنیه اوتطغی اویانه
من ینضام دینک من یضکه الجور من غیم الظلم ینشاف باسمانه
اوکلها اتحققت شنهو البعد ماصار شنهو الما تحقق شنهو بامکانه
صارت بالعکس والمنکر المعروف والمعروف منکر غدت مولانه
اوغطاها الفساد الدغش والغش صار ماتعرفها شنهو الیوم دنیانه
لاخوت صدگ لارحم ظل لا دین لا ربانها الگط یلزمه اعنانه
اوفنانین صرنه الوکت شنهو ایرید کل یوم ابشکل وابوجه تلگانه
اوبالله العدل وله اندرس صار اسنین بس فوگ المحاکم ضال نیشانه
واتخلبص غزلها اوضاع راس الکور والباطل امن الحگ ضاع نیشانه
نتبعمن ورامن نمشیر وین انصیر حیل اوداعتک هالخلگ حیرانه
نفس الجاهلیه الوضع نفسه الیوم یحکمها القوی والحال تعبانه
ینداس البشر تنچتل خلها اتروح ما قوادها اعلیها ابد قلقانه
ذاک اعراگها الافغان الافلسطین یومیه ابدماها اتشوف سبحانه
اولا یلبط عرج للغیره حتی اتگوم لیهزها الامر واتگوم یارجانه
عشاگت کراسی اشترجه منها ایجیک لا ینفع اهل لا ابد جیرانه
باعت ناسها ابابخس ثمن عالغیر باعت دینها اوصارت العوانه
بس کونه ملک صاحب سمو بس شیخ یستثمر شعب خل باع وجدانه
اوما غیرک اظن ینجیها من هالظیم چابعد اشوکت ما خاف تلگانه
***********************
موال
مولای یبن النبی او یاول سبط لنبی
مغرم انه ابحبکم والغیرکم لنبی
لنی لگیت اهلی ایحبونکم لنبی
ذایب ابحبکم یاسد وانه الصرت من ابی
شظن اودن لمن واهوه لمن من ابی
لو تنشد اجوارحی تهون لمن من ابی
قطعا تنب حب علی اوما حب احد لنبی
***********************
مثل عودک چنت یالحسن لدین حمه واچفوف الک للبطل لدین
اشکثر داینت ناسک لچن لدین ابد محد وفه یابن الزچیه
یمن تکرم مکرامک معامن عجیب اعلیک الاجرنک معامن
یقیسونک یبن حیدر معامن الثره من گال یگرب لثریه
کریم ال النبی بس طل بها با فرح والکون ابن حیدر بهابا
بیه هیبت ابوالزها بهابا علی اوایضا حلم امه الزچیه

**************************
لحسین شعری اشعذب وشلذته شعری
لن بی اعضای التحس جلدی الیحس شعری
خلینی حیل ابسگم شامشی عدل شعری
صل وانتفض من اجه ذچره اوشجه ونسجه
والشعر در ینتثر لیلو ذهب ونسجه
حب روض جنه ابارض خصبه انزرع ونسجه
اوشترید ینتج الک من الحسن لحسین
اوطب صیح یاشفایفی بیه ارشفن لحسن
ایسکرک یلنه خمر حب من صدگ لحسین
اوروحک یهزها طرب تشرب نخب عیده
اونایل یدگ الگلب وینعشک عیده
وابلا اراده تظل تصرخ علی عیده
لن موقوافی التجی بل غید من جنه
والشعر لیل الشعر سبحان من جنه
یسحر اعگول الخلگ یدعیها منجنه
یاروح عوفی الحزن وابهل الفرح شعری
*************************
غابه الوکت
یامن الک یالتجی گلبی ان حمه ونضمه
اکتب لعد یا عتب یابن الحسن ونضمه
وادری الیحبکم فتک وین الهضم ونضمه
غابه الوکت والظلم والجور سایدها
اوکل یوم تسدر غدت من امسه سایدها
اوما فوگ ادینه صفت سیدی السا یدها
خبه ابخصایل غبر منهم لفتنه خیل
اوچنه ابیوم الجزه ماخل الینفع خیل
میهمنه ابد هالامرلشرف چانه خیل
لن حته گل الوفه والغیره هم گلت
اونیران لعب الجهل لگلوبنه گلت
وشما علیها تحط من ظیم اهی گلت
تلعب بما تشتهی اومحد الالها یرد
اوطاحت ابزین الزلم واهل المراجل یرد
سیفک بعد یامتی من بحر دمها یرد
اونحضن الجسم المجد لصصدورنه ونضمه
*********************
الشیعی الظلم یالمهدی بهالیک اوحامل شکوته اوعانی بهالیک
نفس الاغدروا بالطف بهالیک اهم عادوا اوذیچ اللعبه اهیه
علی یامذلل الابطال یا حید اوکل عمرک چنت للکفر یاحید
نظل ننطر بدرکم لعد یاحید اولیل الظلم سایدها البریه
الوکت شوف الظلم والغی ظهر باه اوقلیل الظل بعد ینشد ظهر باه
یمر بس لیل ما شوفن ظهر باه الفرج یمته یبن سید البریه
*********************
عقد لیلو
الشعر در اوتبر وتنثره الحلوگ عقد لیلو اشحلاته ابجید خلی
الشعر ریم الفیافی الشعر غرنوگ ابجبینه اهلال بسما صرت طلی
الشعر بدر الذی کل وکت بشروگ اولعد متن ضال عن دربه یدللی
الشعر غنوه ابحلگ حدایت النوگ یسلی الفاجد احبیبه یسلی
الشعر منه احب اتناول اعثوگ تمر گنطار نخلتنه المدلی
عسل ینبع عسل بستوگ بستوگ لعد کل ریج المر مر یحلی
انه باحبال حبه اصبحت مشبوگ مرض ترکه اویسبب سگم سلی
الشعر لو اسمعه اتگول مخنوگ نسیم الهاب الی امن الشمس ظلی
علیه ملهوک انه اعالشعر ملهوگ الشعر بذرت وفه ابگلبی شتلی
وانه ویاه چن عاشگ او معشوگ انه حله واهوه یا ناس حلی
الشعر نظمه ابمدح محبوبی ایلوگ اوشلی ابغیر التحبه الروح شلی
گبل مااصیر منی العگل مبیوگ خذاه اللی لعد گدری یعلی
نمه ویای حبه ابدم العروگ یمرحبلی او الی دایم یهلی
بگه صندوک گلی اعلیه مغلوگ ملک روحی اودلال استحلی
کریم البیت اهوه مامن المرهوگ الذی ابیوم الحشر یشفعلی زللی
الذی ابحبه انه امن النار معتوگ واهوه باب الفرج باچر یحلی
الیوم الکون بیه اسرای معلوگ یدمعت فرحتی هلی دهلی
الحسن لولایته بارگابنه طوگ لخلیله الشعر یرگص لخلی
اصوغ اوزان عذات اولهن ذوگ ابکلام الضاد والقیهن محلی
اوکل باب الاطرگه غیر مطروک جدید الاولی خلیه یوللی
قوافی الما ابد بیها انه مسبوگ انه اخلگهن خلگ مو ینتخنلی
اولخلی السان الی ابکل حفل مطلوگ واگل لروح لا لا لا تملی
دخل گلب الیضده الیوم محروگ اوخلینه الچلاویه نجلی
دخله ابحبل حقده ایموت مشنوگ دصیری اسهام یچلمی دشلی
الحسن فضله اعلی کل مخلوگ اهوه ایفوگ یگلبی ایقارنه یاهو دگلی
الحسن بارگاب کل الناس اله احگوگ اویفوز اعلیه کل شخص الی

ابوذیات زنجیل
اگروم الگوم اخو طاها بطلها اوچم هامه الذی ابسیفه بطلها
العدو کلما اجه ابلعبه بطلها علی ظهر النبی ابکل موزمیه
علی ظهر النبی اوسیفه اویدلاه اوگبل کلها حضن دینه ویدلاه
امنن بالحرب حیدر ویدلاه نفل فتاک عز شان اوحمیه
نفل فتاک گول اوفعل هاشم جد حیدر اویاما اخشوم هاشم
ها صاحب شجاعه اوباس هاشم اوابی اوما لاثگ اثیابه ابردیه
ابی امعدل ابالله اشتلد لافات مثلها اولاخطاها الفکر لافات
علی لمن الدنیه اعلیه لافات ثلث مرات طلگها الشفیه
ثلث مرات طلگها وذبها واهو اشگد شاف مر بیها وذبها
اگلوب ابطال فورها وذبها لجل دینه اوکسبها الغاط میه
کسبها اونالها حیدر وحبها واهوه الشتل بذرتها وحبها
لهذا اولایته نازل وحبها علی اواصبح ولی الطاها اووصیه
علی اوکفین بی و النعم من حید صگرچنه علی العدوان من حید
درب راسم اوعن هالدرب من حید عهد للموت وی حامی الحمیه
عهد للموت اله شیعه واله اتباع الکل منه اوعلیه صم چف ولاتباع
اشلون اتعوفله ناسه ولتباع اوحبه الفوز دنیه اواخریه
فوز ابهای حب حیدر وباخراک واذا یوم الوکت فارک وباخراک
یتملک عطرک الزاچی وباخراک جون اتصیر وتطیب الثنیه
جون اوالک یاه ایصیر من یاه اویاصاحب عگل ماهای منیاه
تصور من وگع واحسین من یاه چساه اوسام عز ابن الزچیه
شارب کاس خمرت حب علی جون اوظل یفتخر عالراحو عالیجون
لهذا ابیوم طب طفها علی جون غده ایغرد اوزفها اعلی المنیه
***************
هله ابشعبان وایامه البهیه اوببدور النبی الشعت سویه
من فاطمه اومن حیدر بشعبان بدر ثالث ایمتنه بشعبان
افرحت مولده ابن الهادی بشعبان ملائکت السمه واهل الوطیه
افرحت فاطمه ابجیته ویه اباها اوربنه ابهل عطیه ویه اباها
سخاها اوزود ابوها ویه اباها ابوجود احسین تلگاهن سویه
عیده اشگد ابن حیدر فرحنه واخذها اهمومنه الچانت فرحنه
اولمن ما انتها وکته فرحنه الحفل عباس عنوان الحمیه
عضید احسین ابو فاضل یحی باه لیل اولادته الشیعی یحی باه
عونه الیوصل امگامه یحی باه یحصل فوز دنیه اواخریه
انولد راعی المروه ابیت یا بیت ابات اوما الغیر المجد یابیت
اله یوم الذی ام عباس یابیت گمر عدنان عم الکون ضیه
گمر عدنان واحسین اوعلی ابناه المجد بیهم ابهمتهم علی ابناه
اوساس الشیده احسینک علی ابناه بنه السجاد یاحامی الحمیه
اوعلینه الیوم لمن طالعیده الفرح من وره اغیابه طالعیده
سنه لوچان یومه طالعیده الشعر وانشد اظل لبن الزچیه
اعله ساس المجد لن دگوا لبنهم اوسجایه الطیب بس اهمه لبنهم
لمن ما توصل الرایه لبنهم نگوم انداعب ازلوف الثریه
الوکت لنه الظلم والغی ظهر باه اوقلیل الظل بعد ینشدظهر باه
یمر بس لیل ما شوفن ظهر باه الفرج یمته یبن سید البریه
************************

 

 

**((لبنک یا حسین))**

امبارک یاعلی اویافاطمه اویااحسین****اویاسید رسلها ابمولد المهدی

عید واحتفال اوفرح کل امکان****واجمل ورد الکم ناسکم تهدی

مو لنّه ذخرکم لعد عسر الکون****واشلون الگطب مابلطرب یبدی

کاس الهنه امنسم والاوتار اتصیح****واحواس الخمس لیه بالشعر تشدی

اوکل الکون لجله امعّید اوفرحان****لابس ثوب عرسه اشحلو متردی

اطیور البالسمه والزی ابمای الهور****سمچه ابلامته والگصب والبردی

اونوارس نهر کرخه اشطیط البکارون اوشاوور الوفی البالحفل متصدی

اویاروعة المنظر والجمال البیه**** چنک من تطبله ابجنة الخلدی

الاشعار الغزل والهوسه والموال****تنعش حلوه حیل ابطیبت الشهدی

لبنک یالحسن للمنحجب عالعین**** للننتظر لینه ایسّیر او یبدی

من اتضیج بینه اومن یچل الیل****لیل الظلم واهله اعروگها اتسدی

اوتصبح لاعداله ولارحم بالکون****ولاخل اعله خلّه ابطیبته ایندی

واتغیم اهموم الدنیه فوگ الناس**** یظهر ابوالغیره الروعها ایهّدی

البیه همه علی اوغیرته البلعباس**** زود احسین ابو وابصارمه الهندی

اوضاگت سیدی اوکل ظنتی ذاک الیوم****حان اوگدر صبره انترس وایبدی

الظلم چلچل ابجوها انملت جور الگاع****ساد الضیم ناسه الوضع متردی

چتل سلب اونهب والشرف حتی انباع****اوزین الزلم ظل لیجیب لیودی

ابجنبنه اطفال تقتل تنسلب نسوان**** چم وحده التناشد ورموا زندی

چنها الغیره راحت والمشاعر ذیچ**** اهی الچانت بهلنه ابجدک اوجدی

اناشد وین صارت موش اهلکم ذول****البلمگوار جابوا طوبها الیردی

العراق انوخذ منکم باگوا افلسطین****لبنان اشتعل واجروحهم تدی

والحگ جسد میت راح حگ الدود****وینک ماتلحگ دهب یالمهدی

تراهم بس عبی وامزریات ابشوت****مامن عرج یلبط زلمک العندی

شطی اوزین اعرفه اوموغمیج اگواشاولتظن العبرته اتریدلک مردی

اوناس اومختبرها ابطوع هبت الریح****ماتحتاج سیف اسویر من بردی

اومن گلی احترگ وآکل اظل بالروح**** ودموع الهظیمه اتبطط ابخدی

________________________

يهدي موقع ادبنا جزیل الشکر للشاعر المبدع هانی علی المذحجی (پوررضا) الصدیق الوفیء للموقع علی ارساله ترجمة الشاعر اسماعيل  المشعلي فنرجوا من الله العظيم له التوفيق و حسن العاقبة و طول العمر.   

 


کل الحقوق محفوظة لموقع ادبنا

TPL_KH_LANG_MOBILE_TOP TPL_KH_LANG_MOBILE_SWITCH_DESKTOP

مجوز استفاده از قالب خبری ناب نیوز برای این دامنه داده نشده , براي اطلاعات بيشتر درباره مجوز استفاده از این قالب به سايت خليلان رسانه مراجعه کنيد .