موسوعة الادب العربي في خوزستان

TPL_KH_LANG_KH_MOBILE_DESKTOP TPL_KH_LANG_KH_MOBILE_REGISTER TPL_KH_LANG_KH_MOBILE_LOGIN

الشاعر سید شبر الحسيني

سید شبر بن سید فرج الحسيني

الشاعر السید شبر بن سید فرج الحسيني:شاعر من شعراء الشعر الشعبي في خوزستان المجيدين هو من اسرة السادات الکرام الموسوية المعروفين في خوزستان والده السيد فرج و کان بضميمة الاسرة يقطن خرمشهر (المحمرة) و لکن بسبب طموح الشاعر و رغبته في اکتساب الثقافة و نيل المراتب العالية هاجر الى الاهواز و تدرج في طلب العلوم في المدارس الحکومية حتى حصل على درجة الليسانس و توظف في احدي شرکات الاهواز. و قد بدأ ينظم الشعر و هو ابن التاسعة عشر من عمره و اخذ يرقي حتى وصل الى اوج الشعراء المعدودين يهتز لشعره و انشاده الجميع و يتطلب شعره الکل و تزدان فيه و في قصائده المحافل و الندوات و هو ينشد الشعر بحماس و  کأنه يجسد مضامينه للعيان في شعره حماسة و جمال ينظم قوافيه کعناقيد متصلة و يرسم الصورة الشعرية باسلوب فني ماهر و کذلک شعره طافح بالمعاني النافعة الذي تشير الى درايته و المامه بالحديث و التاريخ و العلوم الاخرى. کتب الشعر في جميع مجالاته و الاوزانه، يلقي الشعر باسلوبه في المناسبات الدينية و المهرجات الادبية.

من شعره:

 (قصايد)

قصيده بحق الامام الحسين عليه السلام

 

 ابلايه صوت

يا حسين ابلايه صوت .....جيت اصوّت و التصوّت بلسکوت

جيت و الچلمه اسيره

اسّراها ابسيفه چف الخجل من رادت تفوت

و الضمير ايصّلي ابمحراب عثرات الزمان

ارد اعاين للشموخ

وارد اشوف عيون صبح الکبرياء

انته شلّک بلکلام

انته تنطي الدنيه لون

لون مو مثل الصور لتبسّط ابسوگ الجمال

لون قمصان الورود......من يغازلهه النده ابوکت الصباح

لون قوس القزح يخجل منه و امحدّب يجيک

وياخذ اعطور الهوا و يمسحهن ابوجه الحيات

يا حسين انته الآمان .....و علمتنه اشلون نوگف ساعت اليلفينه حوت

و نعلن الحرّيه شربت کاس من ايدک و لا رايح تموت

يا حسين ....صوتک احمر صوت و ايگطّر رسايل بيهه ثوره و عنفوان

و غنّه للحريه چلمات السيوف ... ابلحن من لحن السنان

و دگ دگ ابساميرتابوت اللي ما يحترم اصوات الحمام

آنه اصوّت بلسکوت و السکوت ابلغ کلام

يا حسين ... يا عصارة لأنبياء

انته مو للمسلمين ... ابريحتک يتنشّگ العالم جميع

انته لليشتري العزّه وما يدنّگ للرياح

اليقبل الذلّه حقير

اتشطبه من نص دفترک کل واحد الرايد يبيع

انته شاعرکل زمان ... و ابمسير التمشي بيه اتفض شعور

و من حلاتک تشرگ ابچلماتک احلوگ السطور

و حافر احصانک کتاب و بيه رساله من الحقوق

و انته ما رايد مديح

 و ابمسيرک ما تفکر تستريح

ارفضت ما رايد تعيش اعله التراب

 و گمت حطّيت الرحال ابگاع مالکهه الرحيل

 تعطش و تروي الخلود

 ابکاس بارد ...من احبوب المستحيل

 ما نلم مدحک عله روس الرجال..... و ما يعبر اسفينتک بحر المديح

 مدحک اتلمّه الشمس من الضماير....حته يصبح بيک کل جيل احتفال

يمن ظيّفت الآباء

شامخ ابطول الدهر بلکون ناصبلک مظيف

و من يجي المعتاز تنطيه درس ما تنطيه رغيف 

قصيده بحق الامام     الحسين     عليه السلام

 

ابلايه صوت

يا حسين ابلايه صوت .....جيت اصوّت و التصوّت بلسکوت

جيت و الچلمه اسيره

اسّراها ابسيفه چف الخجل من رادت تفوت

و الضمير ايصّلي ابمحراب عثرات الزمان

ارد اعاين للشموخ

وارد اشوف عيون صبح الکبرياء

انته شلّک بلکلام

انته تنطي الدنيه لون

لون مو مثل الصور لتبسّط ابسوگ الجمال

لون قمصان الورود......من يغازلهه النده ابوکت الصباح

لون قوس القزح يخجل منه و امحدّب يجيک

وياخذ اعطور الهوا و يمسحهن ابوجه الحيات

يا حسين انته الآمان .....و علمتنه اشلون نوگف ساعت اليلفينه حوت

و نعلن الحرّيه شربت کاس من ايدک و لا رايح تموت

يا حسين ....صوتک احمر صوت و ايگطّر رسايل بيهه ثوره و عنفوان

و غنّه للحريه چلمات السيوف ... ابلحن من لحن السنان

و دگ دگ ابساميرتابوت اللي ما يحترم اصوات الحمام

آنه اصوّت بلسکوت و السکوت ابلغ کلام

يا حسين ... يا عصارة لأنبياء

انته مو للمسلمين ... ابريحتک يتنشّگ العالم جميع

انته لليشتري العزّه وما يدنّگ للرياح

اليقبل الذلّه حقير

اتشطبه من نص دفترک کل واحد الرايد يبيع

انته شاعرکل زمان ... و ابمسير التمشي بيه اتفض شعور

و من حلاتک تشرگ ابچلماتک احلوگ السطور

و حافر احصانک کتاب و بيه رساله من الحقوق

و انته ما رايد مديح

 و ابمسيرک ما تفکر تستريح

ارفضت ما رايد تعيش اعله التراب

 و گمت حطّيت الرحال ابگاع مالکهه الرحيل

 تعطش و تروي الخلود

 ابکاس بارد ...من احبوب المستحيل

 ما نلم مدحک عله روس الرجال..... و ما يعبر اسفينتک بحر المديح

 مدحک اتلمّه الشمس من الضماير....حته يصبح بيک کل جيل احتفال

يمن ظيّفت الآباء

شامخ ابطول الدهر بلکون ناصبلک مظيف

 و من يجي المعتاز تنطيه درس ما تنطيه رغيف

*************

القران الناطق

انته یا حیدر تضل عا یش غریب***بین الناس وما تعرفک ناسک

الله رادک ترتفع یا با الحسین*** و خله بیته ایصیر مسقط راسک

***

انته اکبر  من  زمانک   یا امیر***و  منک  الهلیوم  نشتم النسیم

عشت تضحک علذهب واعله القصور *** اترید بس اتضحک اشفاف الیتیم

***

مو فقیر انته و لا معتاز مال*** تبذل و کل عیشتک عیشت فقیر

عله امخاد الریش نوم الاغنیا***و عله اخدودک شفنه مطبوع الحصیر

****

اتخاف واحد بلیمامه و بلحجاز*** ایبات جوعان و یصیر المایصیر

تاکل  الحکام   بلحوم    الغزال***و انته بطنک رافگت خبز الشعیر

***

نزلک دهرک یحیدر و اعتلیت*** ابناس موگد ضلو ایقيسونک

و انته الله ایعرفک قدرک یا امیر***یوم رد قرص الشمس لعيونک

***

شالو القرآن عالي اعله الرماح***صامت اهوا و گالو ايصير الحکم

و انته ناطق انته قرآن الصحيح*** الکسر عصّت چلمتک حصل ندم

***

العمر ینگص یا علی و حبک یزود***حیث کلساعه و تزید المعرفه

الما یحبک من  صدگ عگله مریض*** و تالی فلتات اللسان اتکشفه

***

مطره حبک ياعلي و متروسه خیر*** لاکن الگلوب الخلگ ماهن سوا

بیه گلب صبخه وعداواه اويه النبات*** و بیه گلب بس الک خضر بیه هوا

***

انته بل شدات صاعود الصعاب***و وین ما ذبک ابن عمک تصیب

ما تکر اعله الجفه و لا علجریح***وحتی بلمیدان هم امرک عجیب

***

کرمک الله و فتح لیک الجدار*** وصرت بلبیت و حیاک من العد م

و انته جازیته شکرته بیا طریق *** بیت الله طهريته من الصنم

***

 

اضل ساکت

 

اضل ساکت يطگ گلبي القلم گد ما سکت للحچي ايجرّونه

اغش روحي شگلّلّهه و شگل عگلي اگله ايصدّگ اشما چان يحچونه

اگلّلهه النبي ما وصّا بلکرار و ماعيّن وزيره و منهو هارونه

شمس.... و الما يشوف ا لشمس موش العيب من عدهه ا کيد العيب بعيونه

طه من الزغر متکفّل الکرار و اهما ابعينهم چانو يشوفونه

وشگِت حايط الکعبه لونهه الغير حيدر چان ذاک ا لشخص للزرگه يصعدونه

مريم بعد ما ولدت تهز بلنخله حتّه اتحصّل الرطبات ذيچ المره الميمونه

و ام حيدر ثلث تيام بلکعبه اکلهه من الجنان الهه يجييبونه

مخطط من اله الکون ابجهلهم هلمخطط ما يفهمونه

و ضلو لعد هذا اليوم طرشان و حچي الحگ ما يسمعونه

ابجماجمنه دخل يبنولهم حيطان و ابدمنه خبزهم خل يغمسونه

و خل نحترگ خلّيهم يحرگونه

احنه ابّحر حيدر نگعينه ارواح و عله احبال الولايه انصيح شرّونه

احنه بسم حيدر کل شي ليريدون خلّيهم يسمّونه

حيدر بات بفراش النبي المختار و رضا ابهاذه الدرب فدوه يذبحونه

الشجاعه من ايد حيدر بعد و اتبطّل تلم غرضانهه و اتشيل مغبونه

تاريخ المعارک هاذه بين ايديک فنهم سيف واحد يشبه الکرار ينطونه

انته يا علي الصدّيق وانته يا علي الفاروق مو غيرک والحگ ابطريجک تمشي اظعونه

و انته نفس طه امصرح القرآ ن نفسکم نفس من نفسين معجونه

و انته درة المختار اليبيعون الفحم ما ننتظر درک يثمنونه

انته يا علي رايح تعيش ادهور و خل اگلوبهم خليهه مسحونه

ماعون العمل بولايتک متروس و الما حب حضرتک خالي ماعونه

 

(هات)

لا غزال السلب عگلي لافتات

و صوب طه النبي اعيوني لافتات

ارد افصل خام گلبي لافتات

و اکتب اعليهه ابو الزهرا النجات

****

يا علي وياک دهرک مانصف

و سيف غيرک مثل سيفک مانصف

احنه ويّه الما يحبک مانصف

و اليصف زيناته تصبح سيئات

****

ما بگه ابنخلات وصلک من تمر

و ما احسّن حله ابغيرک من تمر

من تمر گلّي اشيضرّک من تمر

مر علي العايش ابّيت الذکريات

****

مره اشد کارت الحسبه مره حل

مره اون بهداي ونّي مره حل

ابظعنه من گوطر الاسمر مره حل

گمت اتحسّر عله وکتي اللي فات

****

ايصيح گلبي الهجر حنظل يامره

و عنده سلطان اعله حبک يامره

من بنات الوصل رايد يا مره

ايتانن و چذّب الگال امعرسات

****

اذکر آنه اوياک لعبي من حبيت

شکثر لاموني ابمحبتک من حبيت

گلبي من ابيوت وصلک منحه بيت

حته حنظل ريجه يتبدل نبات

****

اعليک گالو بلهوا گلبک ترف

و راية العشاگ بيمينک ترف

انچان عندک ابره وجروحي ترف

جيبهه و تدري اجروحي امعثّمات

****************

ميمر

 

چم مره گتلک ياترف مرمرنه

طوّل اغيابک و اشکثر مرمرنه

صح ما يمض بيه الفشگ مرمرنه

بس خايف ابچف الهجر يتحفّر

******

بيّه طبع بلموزمه منخه اللي

مابيه شهامه و ما اشت من خلّي

اعله اچتافي ثگّل يا دهر من خلّي

منّ المشاکل لا تظن اتگنطر

*****

کل من يخلّک يلوفي خل لينه

و المو خليلک لا تظن خل لينه

لو ترشگ اسهام الخصم خلّينه

نوگف درع و انته ابسلامه اتکتّر

****

اببستان ودّک يلوفي و دّ نّه

و ازحف ازحوف الحضرتک و دّ نّه

ترفات الچلم  و دّ نّه يهواي

حته يخضّر عود حبنه و يکبر

****

اشلون اسهه عن ذکر الترف لامسهه

و اطباعنه چف الصبح لامسهه

لا هسّه لا باچر بعد لا مسهه

ذاک اهوا ودنه و لاتظن يتغيّر

****

لمّينه من ظيم الوکت عبرتنه

شط و العواذل لاتظن عبرتنه

بصدورنه خل تنکسر عبرتنه

بس لا دمعنه من النظر يتحدّر

 

موال

 

بحور الفضل يا علي من غير فضلک تجف

و انته ابجميع المحن ويَه ابو الزهرا تجف

تنطي الوجه بلحرب ما يوم شفنه تجف

يدريک طه کفو و صوبک يذب     حمله

يللي ابکثر ما  تکر  سموک    ابو الحمله

تقلع الباب الحصن و ابيمنتک    حمله

و بحصد روس الزلم بس ذولفقارک تجف

*******

انته النصرت النبي و شورک غده منشره

و مرحب طبرته و نجت ذيچ الزلم منشره

و بفراش طه النبي کل الخطر من    شره

انته الشريت الخطر و ابکل حرب راحه لک

عايش غريب ابوطن ما حصَلت راحه لک

راد و يکع ا لمجد عنَک  لچن      راح الک

وحبک ابهذا الگلب شرَعله    اکبر  محل

و اللي بغض حضرتک اعماله طگهن محل

مانترکک    يا علي    و حيات راسک محال

لو صفَو اضلوعنه  و  گصَوهن  ابمنشره

******

من اتراب جدمک نحب نگعد نشم شمَات

عالوعلينه العده و اتشمَتت      شمَات

والزرع زرع الصبر شي صوفر و شي مات

چم دوب نتنطرک حد يا وکت   لامته

و تدري العواذل بعد کلمن محب لامته

البس لعند الحرب  يا سيدي     لامته

و ما  لازم انشيمک و نته ابو الشيمات

******

يا صاح کافي الهجر طرّه علينه فــــطر

من ماي وصلک گطع صبّح ابگلبي فطر

طير المحبه صدگ زاده گطعته فطــــــر

من غيرک آنه ترا بلهم فرک راحتــــــي

و الگط اهمومي الصبح و اطحنهن ابراحتي

لو رايد انته صدگ ما تنسلب راحتــــي

عايدني ويّه الخلگ بيّام عيد الفطــــر

******

يا صاح خلّي الگلب وکت الشدايد يلد

و الخوف لو يگربک بلسوط يلده يلد

لتگول جسمي ضعف بس ضال عظم ويلد

المهم عزمک يضل مثل البحر رايه له

و ابخيمة اهل العگل زين الزلم راي اله

شخص الذل النفس ما ترتفع رايه له

وکون الجبان و غبر ابتر يضل ما يلد

******

يا صاح دمع الآسف جرّح اجفوني و هل

و هلال ظيم الوکت بيّن عليه وهل

و اللي عليه معتمد ذبني ابحفيره و هل

و فوگ الترايب بعد ثگّل صخر مرمر

و من خاف من طلعتي راح و عليّ مرمر

من دنيتي يا خلگ ريجي صبح مرمر

و خانوني حته الذي چانو گرابه وهل

 

ابوذيه

 

ابحسباته الگلب حطک وشالک

عطش يا حيف ما حصّل وشالک

ترف کل ظنّتي الواشي وشالک

اسنين ارداف بس تلعب عليه

******

الزلم مو بلنظر شطوال شمتان

و ظهر کلمن يضدني و علي شمتان

يموت انچان اطخّن راس شمتان

دگوم ابساع خف جدمک عليه

****

ما امّن من الشيطان مکراه

و طبيعة طينتي للناس مکراه

انشد نهر خدي و شوف مکراه

کرنّه دموع حب الگطع بيه

****

جزر يا دهر کل وکتک ولامد

و دومک تخلف الموعد ولامد

بيک امعسّره آمالي و لامد

چف العوز للما بيه حميّه

****

يدمع العين للتربان بلليل

عله الزهرا الدفنهه صار بلليل

علي مو للفراگ انتحب بل لل

ضلع من غسّل الزهرا الزچيه

****

نشف دمعي ولا بلعين ظلماي

ولا واحد يبويه انظلم ظلماي

يحيدر دفني خلّه ابليل ظلماي

و لا ريد الظلمني ايمر عليه

****

ششلّن من طبر جسمک وليروح

علي وشلون اشيلنّک ولي روح

يبويه الراح من عگبک وليروح

يهون و غيبتک تصعب عليه

**********************

 

 

کل الحقوق محفوظة لموقع ادبنا

TPL_KH_LANG_MOBILE_TOP TPL_KH_LANG_MOBILE_SWITCH_DESKTOP

مجوز استفاده از قالب خبری ناب نیوز برای این دامنه داده نشده , براي اطلاعات بيشتر درباره مجوز استفاده از این قالب به سايت خليلان رسانه مراجعه کنيد .